Showing posts with label Religion. Show all posts
Showing posts with label Religion. Show all posts
Thursday, April 28, 2011
Eng kawng nge i zawh? Khawnge i thlen tawh?
11:37:00 AM | 
Posted by
^-||RaLtE||-^
Chhiartu duhtak, khi picture khian kan hringnun hman mek ah hian awmzia a nei thui viau awm e! He khawvela kan awm chhung hian nang leh kei hian kan thih hunah kan kalna tur kawng engemaw tak chu kan zawh ngei ang!
A lem a mi ang khian pakhat chuan vanram kawng chu a zawh mek a. Chu vanram kawng zawh tur chuan kailawn pakua kaltlang a ngai a, chungte chu: Hmangaihna, Hlimna, Remna, Dawhtheihna, Ngilneihna, Thatna, Rinawmna, Thuhnuairawlhna leh Insumtheihna te an ni. (Galatia 5:19)
Chu kawng chu zawhin harsa takin, tih hram hramna nen Hlimna leh Remna kawngah chuan a kal mek a, harsatna chi hrang hrang awm thin mahsela intlansiakna tha chu um in a bei hram hram a ni. Hmabak a la ngah tih a in hria a, nun uluk tak leh rinawm takin kros kawng chu a zawh mek zela. Khawvel thil, a chakna chawpa boral mek te chu han thlahlel ve rum rum thin mahsela, a din na, a lungpui nghet Lal Isua ah chuan a awm tlat thin a ni.
Pakhat leh zawk khi chu mi piangthar tawh emaw la piangthar ngai miah lo emaw pawh a ni thei. Khawvel parmawina, chatuan daih lo chu thlahlel in thawveng takin a nun chu a hmang a. Inkhawm, Bible chhiar, Tawngtai, etc. a thlahdah em em a. Ama tawkah "Pa" a inti em em a ni. Chutiang chuan a damlai ni te chuan Krista tan nung lovin chatuan boralna kawng hremhmun chu a pan mek a, a thleng thui tawh viau nghe nghe a ni. Chu boralna kawngah chuan heng te hi a awm a: Inngaihna, Bawlhhlawhna, Hurna, Milem Biakna, Dawithiamna, Huatna, Inhauna, Thikna, Thunurna, Inkhinna, Awmhranna, Itsikna, Zu Ruihna, Zu Hmun Hlimna, Rin Hranna leh thihna te. (Galatia 5:22)
Unau duhtak, hei hi i inzawt ve ang u! Khawi kawng khi nge i zawh mek? Nunna kawng nge Boralna kawng? I ding lamin Nunna kawng i zawh a, i vei lamin boralna kawng i zawh bawk em? karkalak in em ni i kal mek? Kan duhthlanna hi a va han pawimawh teh lul em!
Nunna kawng zawhtute chu mi nihlawh tak an va ni em! Lungngaih, mangan, beidawn, harsatna chi hrang hrang ten tlak buak ve thin mahsela, Lalpaah chuan lawm nun an nei thin a ni. Chumi avang chuan an tan thlemna engang pawh tawk ve thin mahsela, Lalpa hming avangin thlemna te an hneh thin a, an nun in Pathian a chawimawi thin a, Pathian ropuina an puang chhuak thin a ni.
Boralna kawnga kal te erawh an dam lai ngei pawhin hremhmun rapthlak zia leh hlauhawmzia hi kawng chi hrang hrangin an tem fo thin.
Hmanah kha chuan sualah kan lo tluk palh thin pawhin Pathian khawngaihna avangin kir leh na hun tha kan nei thin a, thinlung lungchhia leh inchhirin Pathian hnenah kan tawngtai a, Pathian pawlna leh thlamuanna duhawm tak chu chawpleh chilh in ka dawng thin. Tunah erawh kan Pathian thu in a sawi ang khan "Hun khirh tak" hi a thleng chho mek ta! (II Timothea 3:1)Kan thil sual tih te avangin han inchhir ve thin mah ila, Pathian hi koh eih a har ta riau emaw tih tur khawpin a reh tlat thin!! Nimahsela, kan sualte avanga kan inchhira, sima Pathian hnenah kan kir leh hian kan tawngtaina te emaw hul huk in hre thin mah ila, chu hun chu hun pawimawh lai ber a ni tih hria in beidawng lovin Pathian hnaih telh telh nan i hmang thiam hram hram ang u. Chutilo zawngin Zawlnei Amosa an alo sawi tawh ang khan nakinah chuan chaw tamna nilovin, tui tamna ni hek lovin Pathian thu a tamna zawk hi alo la thleng ngei dawn a ni. (Amosa 8:11) Chutih hunah chuan Pathian thu hre chak leh pathian zawngin kan vir buai anga, engmah a sawt tawh dawn si lo.
Unau, Boralna kawngah khian thui tak lo kal tawh mah la, Lal Isua chuan a la hmangaih reng che tih hria ang che. Pathianin sual ngaihdam duh loh a nei lo. chuvangin boralna kawng chu picture a mi ang khian 15-na thleng lo dai tawh mah la nunna kawngah a la kir leh theih a ni tih hre tlat ang che.
Chu nunna kawnga kal kir leh tur chuan boralna kawnga ilo dai tawh zawng zawng kha i pal tlang leh vek a ngai a ni. Lalpa chakna ringin i paltlang ang, Anin a lo tanpui dawn che a ni.
Tun hi hun lawmawm chu a ni a, tun hi chhandamna ni chu a ni. ~ II Korinth 6:2
Lalpan malsawm che u rawh se. Amen.
Chhiarzawm rawh
Category:
Monday, March 14, 2011
AMOSA 7: 11-14
3:23:00 PM |
Posted by
^-||RaLtE||-^
"Lalpa PATHIAN thu chhuak chuan, Ngai teh u, nîte chu a lo thleng mêk a ni, chûng nîah chuan ramah chuan ṭam ka tîr ang a, chaw ṭâmna nilovin, tui ṭâmna ni hek lovin, LALPA thu hriatna ṭâmna zawk chu. Tin, tuifinriat aṭangin tuifinriatah leh hmâr aṭangin chhakah pawh an vâkvai ang a; LALPA thu chu zawng tûrin kil tinah an tlân ang a, an hmu lo vang. Chumi nîah chuan nula leh tlangval ṭhalaite meuh pawh tuihâlin an thidang ang a. Samari pathian lim chhala chhechham a, ‘Dan pathian hmingin’ titu emaw ‘Beerseba pathian hmingin’ titu emaw pawh chu an tlu ang a, an tho leh tawh lo vang."
A va râpthlak dawn tehlul em! Hetiang hi kan tawn ve loh nan hawh u, kan awmdan thalo te bansanin Pathian hnenah i kir leh ang u. A rawngbawltu mai nih duhtawk lovin A rawngbawltu A mi hmantlak, a hmanrua te zinga pakhat ni ve turin i in hlân thar leh theuh ang u.
Lalpa'n malsawm theuh che u rawh se. Amen.
Chhiarzawm rawh
Tuesday, November 23, 2010
Satanism in Mizoram!
2:55:00 PM |
Posted by
^-||RaLtE||-^
Kan ramah hian satanism chungchang hi kan media-ah te leh thuhriltu engemawzat te hian an sawiin an chhuah ta fo mai a. Awih lo fe fe tamtak an awm laiin awih pawh kan kat nuk a. Setana kohhran lo indin chhoh dan, Anton Lavey tih vel erawh sawi ka tum lo. Ka sawi duh zawk taka chu kan ram, Mizoram, ringtu za a za awmna intihna ramah hian satanism hi a awm tak tak a, setana hnena mahni taksa zai a thisena inhlan/inthawi thin te hi an awm tak zet zeta, chutih rualin in lak pa nan emaw, mite attention hip nan lo inti satanic ve em em te pawh an awm tho mai.a
Kei ngei pawh hian kum thum chuang zet chu heng ho hi kalo hmachhawn ve tawh a, Pathian khawngaihna zarah chhanchhuahna chang pawh an awm ve nual tawh nghe nghe a ni. Chuvangin titi leng vel atanga ka hriat leh ka zeldinna atangin ka ziak dawn lova, keimah ngeiin a takin kalo experience tawh avangin anmahni ka kawm thinna atangin thil tamtak ka hria a, chungte chu ka ziak dawn ani. (An thil tih dan zawng zawng erawh fimkhur thu hlaah ka ziak vek lovang)
And here is the rest of it Engvanga setana hnenah chuan lo inhlan/inthawi nge an nih?
Miin setana hnena an inthawi hian chhan leh vang chi hrang hrang an lo nei nual hlawm maia. Chungte chu i han thlir ho ang u:
1. Thenkhat chuan anmahni tiduhdah thin tu, an nu hrawn emaw an pahrawn emaw, an thiante emaw, midang pawh ni se, tih nat/sawisak ve an duh avangin thiltihtheihna dilin setana hnenah hian an lo inhlan ve mai thin.
2. Ruihtheih ching ho leh awm herh ho hian an ruihtheih chin te an neih theih na turin setana hnenah anlo inthawi fo bawk thin. (Setanan chawplehchilhin a pe mai bik lo. Pawisa ruk tur emaw, an ruihtheih neih theihna tur remchang tak an neih theih nan sual tih na hun remchang a siamsak zawk thin).
3. Naupangte an la nih laiin cartoon-ah te leh movie lamah pawh power nei ho an en nasa a, power neia an insual bur bur te hmuhnawm anlo ti a. An rawn lian zela chu thiltihtheihna (power) chu neih ve duhna thinlung an lo nei a, setana hnena lo inthawi ta hial mai te pawh an awm bawk.
4. Thenkhat erawh chu an thiante satanic lo ni sa ten an sawm ve avanga an inthawinaah kal ve in lo inthawi ve ta mai pawh tamtak an awm bawk.
5. A dang leh chu mihring mihrinnaah pawh sual ve hrim hrim, tha duh hauh lo te hian (an vai chuan an ni chuang lo) anlo inthawi ve thin bawk.
An inthawi tawh hnu hian engtinnge an awm zel?
Setana hnena inthawi zawng zawng hi setanan alo dawnsawn dan a inang vek kher lo va. Thiltihtheihna chak tak a pek te pawh an awm tehreng mai. Chutih rualin a then te erawh chu thiltihtheihna leh an thil duh te a pek theih nan condition alo siamsak ve fo thin. An taksa, an hmelthatna lai tak te zaia chumi thisen hmanga inthawi kher tur te pawhin a ti fo thin a ni. Hetianga lo ti tawh te pawh ka tawng fo tawh mai. An that laia hmeltha tak ni thin kha setanan an hmelthatna te chu engmah lovah a chantira, hmuh tlak loh khawpa hmelchhia te an lo nih phah ta thin a ni.
Mahni thisena inthawi tawh ngat chin ho phei hi chu setana hian a vil ngun bik a. Thil pawi/thil sual lian tham tak tak ti tur ten thu a pe a, a then te erawh mahni intihlum turin kham sang tak atanga zuang thla tur ten, inawkhlum tur ten, mi thisen chhuah tur te leh hurna kawnga nasa taka mi thlemthlu/hruai lut tur ten thu a pe bawk thin a ni. Setana thupek anga an tih mai loh chuan zanah te an mutnaah a rawn tihthaih fo va, hmelchhe em em, dum nguk mai, hmul thur ang ten a rawn inlar fo va, natna mak tak tak, doctor te pawhin investigation chikima an endik pawha natna hmuhchhuah theih siloh hmang ten a ti na fo thin a ni.
Thenkhat ve thung ah erawh chuan ngainatawm tak, tlangval/nula hmeltha tak ang ten a inlar bawka. A hnena an inthawi zawh khan an thil dil te pe turin a intiam a, mahse phut let a nei ziah thin a ni.
Setana hnena lo inhlan tawh, thui tak lokal tawh te phei chu an thlarau tirh chhuah theih na thuneihna te a pe a, anmahni atangin ramhuai tirhchhuah theihna thuneihna te a pe a, an huat zawng/an mi ngei zawng te an va tihthaih tira, an va sawisa thei thin a ni.
Tin thenkhat dang leh te chu setana hnena an inthawi leh hun atan an rawn ken tur signs & symbols mak pui pui te a pe a, chu chu an inthawi leh hunah setana hnenah an hlan bawk thin a ni.
Eng hunah nge an inthawi thin?
A tlangpui thu in full moon zanah hian an inthawi tlangpui thin. Group te tea inthawi thin te pawh an awm a, chutah chuan satanic ho zing rau rau ah pawh a "King" leh "Queen" bik te an nei thin. Tin, a then te erawh group nei ve lem lo, satanic dang ho va thurual pui ve lem lo, mahni inchhunga lo inthawi ve mai te pawh an awm nawk. A tlangpui thu in, hmun fianrial, midang ten an hmuh phak lohna hmun ni a an hriatnaah te leh thlanmualah te an inthawi tlangpui thin.
Aizawlah ringawt pawh hian group engemaw zat an awm tawh a. Chung group ho zinga thenkhat chuan an mi leh sa inhriat hran nan an ke ah Star (pentagram) tattoo te an chhu thin a. Thenkhat chu tuai ni miah si lo, an mithmulahte eyebrow an hnawih dum thin bawk a ni.
Anih leh enge satanic ho hian kristiante ah hian thil tum an neih?
Satanic ho hrim hrim pawh hi an inang lo nuaih a. Thenkhat chu kohhran, khawtlang, thalai pawl, etc. ah nelawm taka lana, rawngbawltute pawh nelawm taka kawma, zawi muanga an nun tihchhiat sak hi an tum thenkhat te zing ami a ni a. Nimahsela, satanic zawng zawng hian tum thuhmun pakhat an neih erawh chu Pathian Biak In tihbawrhbana, inthawina hmuna hman hi a ni.
Satanic an nih leh nih loh chu engtinnge kan hriat theih ang?
Kan sawi tawh ang khian satanic ho hian theihtawpin an zia thup ve hram an duh thin a. Tin, satanic an nih avang hian englai pawhin setanan a awmchilh loh chang te pawh an nei ve thin tho va. (Hetih hun lai hian an nun an ning ve thina, Pathian mi te an pan ve fo thin a ni.) Pathianin a hranpa liau liauvin hriatna min pe te anih loh chuan kan bulah thu ve reng mahsela, a hriat chuang loh. Nimahsela, Pathian thu te sawiin tawngtaina te han nei ila, thlarau indona Pathian hmingin han puang chiah ila, chutah tak chuan an buai thina, an zia a rawn chhuak ta thin a ni.
Chu lo leh ah chuan Pathianin A thlarau thianghlim thiltihtheihna min pek hmangin kan ringhlel anih chuan an taksaah (khawih kher a ngai lo) kan kut kan han phar hian an chhunga ramhuai bawlhhlawh te chuan awm ngaihna an hre lova, an zia an rawn chhuah fo bawk a ni.
Pathian phatsana setana bia a inthawi tawh an ni sia, an chhanchhuah theih tho em?
Pathian ngaihdamna leh hmangaihna lo thuk zia hi a takin kan hmu fo thin. Heti khawpa Pathian lo phatsan tawh tu te pawh hi Pathian chuan alo la chhandam duh teh meuh mai. Lal Isua khawvela alo kal lai pawh khan ramhuai pai te a hnawhchhuah thin kha!
Nimahsela, heng satanic ho chhanchhuak tur erawh chuan rinna ngheta kan din a ngai tak meuh meuh va. Lal Isua nun neilo tan chuan thil tih mai mai chi a ni hauh lo le! (Lal Isua kan nun ah kan neih leh neih loh chu Pathian leh setana hian an hre khawp mai!) A chhan chu, an mihring chakna mai ni tawh lovin setanan a tirhkoh ramhuaite a rawn tira, ramhuai bawlhhlawh ho chakna nen an tang kawp tawh a, chak tak hi an ni ringawt. Pianphunga cher em em, vawi khat hnek pawh dawl lo tura kan ngaih te hi kan man bet zo meuh lo a ni ber! Mahse, Pathian chakna leh thiltihtheihna rinchhana kan beih erawh chuan eng anga chak pawh ni sela, kan ban kan han phara Pathian hminga thu kan pek chuan an thal nghal thuai zel mai ani!
Setana hian a ma hnena lo inthawi tawh, a mi leh sa te hi a hre em em a, chan palh pawh a hlau hle a, chuvangin an kawchhunga ramhuai bawlhhlawh awm ho hi Pathian thiltihtheihna rinchhana sawisak hrep phawt an nih loh chuan an chhuhsan kim duh lo khawp mai. Ramhuai dawihzep tak tak leh ramhuai ngeng tak te pawh hi an lo awm ve zela! Chutianga, an chhuahsan tawh ni a kan hriat veleh tawngtaina nen an taksa pumpui chu Pathian thiltihtheihna hmangin kan kutin check chhuah leh vek an ngai fo thin (khawih kher an ngai lo), a bang nawi kan tih ang hi an lo la awm chawk thin. Chutiang chu uluk leh fimkhur taka kan zawn chhuah veka kan hnawhchuah vek phawt loh chuan Pathian thu an la ngaithla tha theilo fo va, chhandamna an la chang thei tak tak thin lo.
Ramhuai pai, satanic an ni emaw ni lo emaw kan hmachhawn dawn anih chuan Pathian thu-a counselling pianthar tum nghal ngawt a fuh ber lo. Pathian thu chu thinlung leh tihtakzeta an dawn theihna turin an kawchhunga mi kha sawisaka hnawhchhuah phawt an ngai fo thin tih hriat a tha hle.
Pathian hian misual ber te pawh a ngaidam duh a, ngaihdam tlak tawh lova inngai thleng te pawh a ngaidam thei/duh ani tih hi ilo hre thar leh ila. Chuvangin kan chhungkuaah emaw, kan chhehvelah emaw hetiang mite hi an awm anih chuan hawisan mai lovin Pathian chhanchhuah tak tak an chan theih na turin nang leh kei hian tih tur kan nei a ni tih i in hre nawn fo ang u.
Pathian hnenah a rawng chauh bawl tura inhlan tawh theuh kan nih ka beisei. Chuti anih si chuan kan tawngtaina hla pawh hi belh leh ila, Pathian thlarau thianghlim thilthlawnpek "thiltihtheihna" te hi dil tel ila a tha hle mai. Lalpan rem a tih chuan nang leh kei hi a hmanrua te zinga pakhatah min hmang thei si a. Chu thiltihtheihna kan dil tur chu hei hi a ni:
1. Pathian rawngbawlnaah ralhmatawngah leh sulsutauh tan ngam.
2. Damlo te chungah kut nghata tawngtai saka damna an chan theihna tura thiltihtheihna
3. Thlarau thianghlim hminga a mite malsawm theihna
4. Ramhuai bawlhhlawhte sawisak leh hnawhchhuah theih na thuneihna nasa tak.
Hawh u, hun leh ni te a that tawh loh em avang hian fimkhur takin nung ila, kan buante hi tisa leh thisen mai nilovin, van hmuna thlarau sual awm te an ni zawk tih hre rengin hma thar i la tlang theuh ang u.
Lalpan malsawm rawh se.
Share
Chhiarzawm rawh
Saturday, October 23, 2010
Misual tawngtaina!
10:23:00 AM |
Posted by
^-||RaLtE||-^
Lalpa, thil tam tak dil duh che ka nei a. Nimahsela, I hnena ka dil duh zawng zawng erawh ka dil hreh ngawih ngawih che a ni! Tawngtaina chhangtu Pathian I nihzia ka hria a, misualte tawngtaina pawh I chhang thin a ni tih pawh a hria leh ringtu ka ni.
Nang chuan duh dan hran leh remruat dan hran I nei a, kei erawh chuan mahni nawmsakna tur ngaihtuahin ka dil thin si che a. I hnena ka dil tamtak hi nang chuan chawplehchilha min tihsak chang a awma, chutih rualin ka hmuh loh chang pawh a awm fo thin.
Lalpa, ka sualte ngaihdama a awm theih nan leh chhandama ka awm theih nan te, chatuan nunna ka neih theih nan te nang chuan ka tawrh ai ilo tuara, ka thih ai thih ilo thlang a! Nang chuan min lo din a, he khawvel eng minlo hmuhtira. Min din tirh ata misual ni mah ila nang chuan min hmangaih em avangin tun thleng mai hian ka nunna min la chelh saka, englai pawhin min venghim thin a. A ni, Lalpa, ka mamawh tinreng, ka tana tha tur chu nangin min tihsak thin a. Ka awmdan zawng zawng nangin I hre vek a, ka hun leh ka nun hman dan tinrengah I vantirhkohte min venhim tir thin a.
Chhungkua duhawm tak min pe a, thenrual thate leh min hmangaihtute nen. I kawngte leh I thupekte ka hriata ka zawm theih nan I baibul thianghlim min pe a, thlarauva ka thanlen zel theih nan Kohhran min siamsak bawka. Ka nun kawng ka hloh a ka pen bo san loh nan che nang chuan ka hmaah hmanrua chitinreng I chhawp thin a, thlemna ka tawh pawhin ka hmaah tlanchhuahna tur min chhawp sak thin a.
Lalpa, min hmangaih avanga ka chunga I tih loh enge awm le! Chatuan nunna ka neih theihna turin ka chungah tih loh lah I nei hek lo! Ka ril a tam in ei tur min pe a, ka tui a hal in in tur min pe a, ka zahmawh a lan loh nan silhfen min pe a, awmna tur in tha tak nangin min buatsaih sak a, ka damloh in nangin min tidam thin a, ka manganin min tanpui thin a. Ka phak ang tawka I rawng ka bawlin nangin I thiltihtheihna leh I ropui zia lantir nan I hmanruaah min hmang thin a.
Nghei lovin min siam a, ka chak lohna a ta chakna min pe a, hlauhna ka neih in nang chuan huaisen min zirtir a, tuarna ka chunga a lo thlenin chhelna min zirtir thin a, rinawm lo taka ka khawsawkin rinawm min zirtir a, finna ka tlakchhamin nang chuan I finna in min thuam leh thin a!
Heti kauva I mi hmangaihna thuk tak leh I zahngaihna leh I mi lainatna nasa tak ka chunga I lantir chung hian Lalpa, ka va han phatsan ngun tak che em! I mithmuh leh hriatah nasa takin sual kawng ka zawh san che a. Khawvel hlimna, a chakna te chawpa boral mek, hlimna tluantling pawh daih lo te chu hre reng chung si in ka vah bo san lui che a. Hmangaihna leh zahngaihnaa khat Pathian I nih zia te, thikthu chhia, kanral hmang Pathian I nih zia te chu hre reng mah ila, keima duhthlanna ngeiin ka phatsan lui fo thin che a. Chawp leh chilhin ka chungah hremna I lek loh avangin sual kawng chu ka dai thuk tial tial a, Nangma mithmuh leh hriatah tih lovah chuan mi bo/thlarau bo ka lo ni ta der mai!
Ka thil chin thalo leh ka suahsualna te chuan natna hmangin min vaw let ta e! Natna khirh tak leh benvawn tak, tawrh hrehawm tak leh manganthlak tak te chuan min bual khat tlat tawh a. Ka nitin-zantin nun leh hun hman dan chu tuarna nen a lo ni ta! Ka lo vah bo san rei tawh em che avang leh sual kawngah thuk tak ka lo pil tawh avangin inchhira I hnen rawn hawi leh ka tum pawhin ka tawngtainate a hul em em a, thinlung leh tihtakzetin I hnenah ka tawngtai thei lo va. I baibul thianghlim ka han keuva, ka han chhiar ve ngial pawhin nungin ka chhiar thei ta hlek lo mai a! Lalpa, nang chuan min kalsan ta a, I thlarau thianghlim hi min lasak ta emaw tih mai turin ka nun a khawro a, hlimna leh thlamuanna, nangmah atanga chhuak chu ka dawng thei ta reng reng lo mai a!
Ka nun chu a ruk takin a beidawng em em a, nimahsela Lalpa, nangmah avang chauhvin ka rilru ka ti chhel hram hram a ni.
Chuvangin, ka suahsualna leh khawlohna zawng zawngte leh he tuarna leh manganna, hrehawmna leh beidawnna nun atang hian rinna in I lalthutphah hma chu ka awm angin ka rawn pan e. Nang lo chu sual ngaidam thei Pathian dang an awm lo va, I hnen lo chu kalna tur dang ka nei hek lo. Nang lo chu Pathian dang ka nei lo va, nang lo chu innghahna leh beiseina dang reng ka nei ta lo! Chuvangin Lalpa, tunah hian ka suahsualna zawng zawngte leh ka khawlohna zawng zawngte chu simin, kalsanin, I mi ngaihdamna leh siamthar leh na dilin, ka thlarau chhandam tur leh min dinthar leh turin I khawngngaihna sang ber chu ngenngawl takin ka rawn dil leh che a ni.
Aw Pathian, keimahah hian thinlung thianghlim tak siam la;
Ka kawchhungah hian thlarau dik tak siamthar leh ang che.
I hnen ata hi mi paih bo suh la;
I thlarau thianghlim hi mi lak sak suh ang che.
I mi chhandam hlimna chu mi pe leh la:
Thlarau tihnuamin mi chelh reng ang che.
Share
Ka kawchhungah hian thlarau dik tak siamthar leh ang che.
I hnen ata hi mi paih bo suh la;
I thlarau thianghlim hi mi lak sak suh ang che.
I mi chhandam hlimna chu mi pe leh la:
Thlarau tihnuamin mi chelh reng ang che.
Lalpa, i hming lo zahawm sela, i ram lo thleng rawh se. I hming chu fakin awm rawh se. Amen.
Chhiarzawm rawh
Wednesday, August 25, 2010
Pa min hmangaihna hi!
1:13:00 PM |
Posted by
^-||RaLtE||-^
Pathianin nunna min pe a, Amah hriatna kawngah nu leh pa te leh rawngbawltu te hmangin tet te atangin A hnen min hruai a. Naupang te ka la nih lai in piantharna ka lo chang ve tawh a, Kristaah chuan siamthar ka lo ni ve tawh a. Rawngbawlna lampang hrim hrim hi a awmzia pawh kala hrethiam ve lo va, Pathian duhzawng ni a ka hriat ang angin ka nung chho ve bawrh bawrh thin a.
Tichuan, kum a lo ral zela, taksa te pawh a lo thang chho ve zel a. Mi chi hrang hrang te nen kan han inhmelhriat chho va, thian te kan lo ngah chho ve zela. Nu leh pa ten ti lo tura min zirtir thin te tih ruk ka lo ching chho ve tan a. Thuawih lohna leh luhlulna te, run luih na te, rinawm lohna kawng te chu ka dai chho ve tan a. Khua a lo rei zela, ruihtheih thil tih ruk te ka han ching chho ve ta zel a. Tlangval te ka han ni chho ve a, kohhran, KTP leh khawtlangah te mi in fel min ti se tih duh vangin ka han inhmang chho ve a. Nun tak nei si lovin chawhpawlh takin ka nun chu chutiang chuan ka hmang thin a. Hotu/hruaitute duhsakna avangin KTP/khawtlang, etc. velah te nih na neuh neuh te ka han nei chho ve a. Ka chanvo neih reng reng chu tha takin ka tihlawhtling ziah a nimahsela, remchang a awm apiangin sual tih ka hreh chuang lova, sual tih ka thulh chuang hek lo va.
Chutianga nun chawhpawlh taka ka khawsak lai leh boralna kawng ka zawh mek lai chuan Pa hmangaihna aw chuan ka thinlungah thu a rawn sawi ta a. Ka nun dan zawng zawng te chu ka thlir kir a, mi bo – mi khawngaihthlak tak ka nih zia ka hre chhuak ta a!
Chutih lai chuan ka thinlungah hla thu a rawn lang a, chu chuan ka thinlung a hneh em em maia, ka mittui te chu hruk sen loh tur emaw tih hial turin a luang zawih zawih a, ka nun chu nasa takin tih danglamin a lo awm ta a ni.
Chu hla thu chu hei hi a ni…
Vâk bo mai ka lo ni a
Ka Lalpa hmangaihna a ta.
Tunah min zawng hmu leh ta e
A hmangaihna ropui chuan!
Thlamuangin zân mu ka chhing thei ta,
Lungkham reng ka nei tawh lawng.
Min hmangaih zia ka hriat vangin,
Kei pawhin ka hmangaih ve tawh ang a,
A hmangaihna ka chhuang zel tawh ang.
A fa ka nih tawh vangin,
Ka mamawh tinreng min pe ang;
Khawvelin a neih phak loh chu.
A hmangaihna thuk tak chuan,
Min kalsan ngai lovang;
A Hmangaihna chuan min chelh reng ang.
Lei leh van te lo ralin,
Tlangte pawh lo pil mahse,
A danglam ngai lawng ka Lalpa chu-
A hmangaihna a ngai reng fo ang.
Chhiartu duhtak te u, in thiamna, in finna, in hriatna te Lalpan nasa lehzualin tih pun sak che u sela. In natna te tidam sela, A tan nasa lehzuala rawngbawl turin ti chak mawlh che u rawh se.
Lalpa’n ropuina chang rawh se. Amen.
** A hnuaia Divshare Bar-a Play button khu click la, a hla chu i ngaithla thei ang. (Ka computer-ah microphone tereuh te nena ka aw (voice) ka record chawp ve mai mai a ni e. A chhuanawm vak loh!)
Download duh tan
Click to download
Share
Chhiarzawm rawh
Monday, August 23, 2010
Damlo tawngtaina
2:31:00 PM |
Posted by
^-||RaLtE||-^
Lalpa, ka natna hi min tihdam sak la,
Ka tawrhna a ta hi min chhanchhuak thei tu,
Min tidam thei tu I ni tih min zirtir ang che.
Hlauhna ka neih thin te hi
Chakna leh huaisenna min pe tu ah siam ang che.
Thu chauh sawi la ka dam ang;
Nangmahah chauh tihdam theihna leh thiltihtheihna a awm si a.
I hnen lo chu kalna tur dang ka nei lo,
Ka natna leh ka tawrhna zawng zawng hi
I hnenah ka rawn hlan e, Lalpa.
Ka chak loh na ah Nangin min tanpui la,
Nangmah ang turin min siamthar ang che.
Natna leh hrehawmna ka tawrhte hi,
A phena I malsawmna, he khawvelah chauh ni lo-
Van in nuam thlenga chatuana nunna chan na a ni
Tih min hmuhfiah tir ang che.
Thihna ten thla an lo zar hunin
He khawvel ka lo chhuahsan dawnin
Nangmah nen chatuana leng tawh turin,
Nangmah nen chatuana leng tawh turin,
Ka lei taksa kalsanin,
Ka thlarau I kutah ka hlan ang.
Ka thlarau I kutah ka hlan ang.
Share
Chhiarzawm rawh
Sunday, August 22, 2010
Ka tawngtaina!
7:01:00 PM |
Posted by
^-||RaLtE||-^
Aw Lalpa, min hmangaih zia ka hria a, I zahngaihnate leh I lainatna thuk tak avangin tun thlenga ka nunna min chelh sak zia pawh ka hria. I zilhhauna te, I thununna te leh I hremna ka chunga thleng thei hi hlau lo ka a ni lo va, I van in nuam lah thlen ve loh hlau ber ber te zing a mi ka ni lawi a. Ka ring lo che a ni lo va, piantharna ka la chang lo lah a ni hek lo. I lehkhabu thianghlima I thu te hi ka hre reng reng lo pawh a ni lova, I zirtirna te hre miah lo lah ka ni hek lo. Tawngtaina chhangtu Pathian I nih zia ka hria a, Pathian, engkimtitheia I nih zia pawh ka hria. Hmangaihnaa khat Pathian I nih zia ka hria a, kanral hmang Pathian I nih zia pawh ka hria. Nang lo chu innghahna tlak Pathian dang reng reng ka neih loh zia ka hria a, I hnenah lo chuan sual ngaihdamna famkim a awmloh zia pawh ka hria. Mangan laia tanpui vartu hnai reng I nih zia ka hria a, thlamuantu duhawm I nihzia leh chatuan nunna min pe tu I nih zia pawh ka hria.
Aw Lalpa, heti chung hian nuam ka tih dan in ka nung a. Ka nun chu zawi zawi in ka lo inthlahdah chho zela, I hlatah ka lo awm ta a. Baibul chhiar leh tawngtai te ka thatchhe ta viau a, inkhawm lah ka thulh ta fo bawka, I duhloh zawng te chu hre reng thin mah ila ka bawhchhiat san che a, ka lo phatsan ta che a ni.
Chutianga ka nun ka hman mek lai chuan I mi hmangaihna thuk tak avang chuan khawvel lamah nasa takin ka lo tlan hman tawh a ni tih ka han hrechhuak ta a! Ka taksa, ka rilru, ka thlarau nasa takin tih hrehawmin a awma, ka inchhir em em a ni. Chuvangin aw Lalpa, tunah hian thinlung lungchhia leh inchhirin, simin I lalthutphah hma chu rinnain huaisen takin ka rawn pan e. Ka suahsualnate avangin khawngaihtakin min ngaihdam la, ka khawlohna zawng zawng te hi khawngaih takin min thai bo sak ang che. I hnen lo chu kal na tur dang ka nei lo va, Nang lo chu bel tur dang ka nei hek lo. Nang chuan ngaihdam theih loh I nei lo tih ka hria a chuvangin aw Lalpa, Sam ziaktu in a lo sawi ang khan,
“keimahah hian thinlung thianghlim tak siam la,
Ka kawchhûngah hian thlarau dik tak siam thar leh ang che.
I hnên ata hi mi paih bo suh la,
I thlarau thianghlim hi mi laksak suh ang che.
I mi chhandam hlimna chu mi pe leh la,
Thlarau tihnuamin mi chelh reng ang che”,
Ka kawchhûngah hian thlarau dik tak siam thar leh ang che.
I hnên ata hi mi paih bo suh la,
I thlarau thianghlim hi mi laksak suh ang che.
I mi chhandam hlimna chu mi pe leh la,
Thlarau tihnuamin mi chelh reng ang che”,
tiin thinlung leh tihtak zetin ka rawn tawngtai a ni. Chutichuan aw Lalpa, tun a chinah chuan tirhkoh Paulan a lo sawi ang khan “ka chak loh apiangin a ni ka chak thin ni”, a tih nun hi kei pawhin ka theih tawkin ka zir tawh ang. Ka chaklohna lai tak te hi Nangma hming avangin chak nan hman ka tum zel zawk tawh ang.
Aw Lalpa, I rawngbawl turin ka lo inhlan ve laklawh tawh a, chuvangin kir leh thei ka ni tawh lo tih min hriat nawn tir fo la, kei leh ka chhungte leh midangte tan taksa, rilru leh thlarauvah I malsawmna thlentu ni zel thei turin min dinthar leh ang che. Isua hmingin ka dil a che, Amen.
Share
Chhiarzawm rawh
Thursday, August 19, 2010
Lalpa lawmthu kan hrilh che
12:05:00 PM |
Posted by
^-||RaLtE||-^
Lalpa lawmthu kan hrilh che,
I malsawmna tinreng vangin.
Nitinin kan fak zual zel ang che,
I chhandamna hlutak vangin.
Kei ang misual nung tlak lo hi,
Min ensan ngai lo.
Hriatthiam a har ka ti,
Min hmangaihna hi!
Ka hawikir san lawng che,
Ka Lal Isu;
Ka theihna zawngte nen,
I rawng ka bawl zel ang.
Thlarau tamtak bo na ram,
Khawvel hmun zau takah hian,
Nitinin sualna ten min chim thin,
Kal ngaihna kan hre thin lo!
Min hruaitu lo ni zel la,
Ka bona ramah hian.
Suala bo te chhanchhuak turin aw Lal Isu,
Min rawn pui ang che.
Share
I malsawmna tinreng vangin.
Nitinin kan fak zual zel ang che,
I chhandamna hlutak vangin.
Kei ang misual nung tlak lo hi,
Min ensan ngai lo.
Hriatthiam a har ka ti,
Min hmangaihna hi!
Ka hawikir san lawng che,
Ka Lal Isu;
Ka theihna zawngte nen,
I rawng ka bawl zel ang.
Thlarau tamtak bo na ram,
Khawvel hmun zau takah hian,
Nitinin sualna ten min chim thin,
Kal ngaihna kan hre thin lo!
Min hruaitu lo ni zel la,
Ka bona ramah hian.
Suala bo te chhanchhuak turin aw Lal Isu,
Min rawn pui ang che.
Chhiarzawm rawh
Natna kan tawrh dan hi!
10:17:00 AM |
Posted by
^-||RaLtE||-^
Tuarna han tih hian thil tamtak, kawng hrang hranga mihring ten kan nitin nunah tuarna kan tawh thin te leh chu tuarna hmachhawn dan te leh tawrhna phena malsawmna awma chu hmu a, chan theih dan te tarlan tum a ni a. Chhiartute, taksa rilru leh thlarauvah hlawkna nasa tak in chan ka beiseiin duhsakna sangber ka hlan che u a ni.
Taksa natna chi hrang hrang avangin kan tuar thei a, rilru natna te leh thlarau lam nantna te, tihduhdahna leh hmuhsitna avang te in kan tuar thei. Taksa, rilru leh thlarau hi thil hrang theuh ni mahse pumkhat an nih si avangin taksaah chauh natna nei pawh ni ila, a nat em avang leh a hrehawm em avangin rilruah a kangkai fo thin ani. Chu chuan lungngaihnate, mangannate, beidawnnate mihringah a thlen fo thin.
Taksa natna bik thlir ho ta ila…
Taksa natna tihbaiawm tak tak te, natna benvawn te leh natna hrim hrim kan lo neih hian a tuartu tan lo chuan a hrehawmzia leh a natzia hriatthiam a har thin hle mai. Tuarchhel takte leh zuau deuh te a awm theih a, a tuartu kan nih miau loh chuan an natnate an han sawi pawh hian "ava zialo ve", "ava pawi ve", te kan ti liam leh mai thin.
Doctor-te kan pana, a then phei chu phai lama inenkawl tura refer hial ngai te kan awm thin. Tawngtai damthei Pathianin a hman mek te leh a hman lem loh te pawh miten pan ve rawh an tih chuan dam kan duh em avangin kan pan fo thina, chu chu ei rawh, ti rawh an tih apiang te kan ti ve leh pawp thin. Kan dam phah leh si loh hian kan rilru a beidawnga, kan mang a anga, lungngaihna ten min tlakbuak fo va, beiseina a bo duh viau thin. Engtinnge ni ta ang le? Bible kan han chhiara, beisei leh ring tak chungin kan tawngtaia mahse engmah chhanna kan hmu mai bawk si lo! Rilru hi a tawi tut duh khawp mai.
Lal Isua khawvela a awm lai khan damlo natna chi hrang hranga na te a tidam thin a, "Tho la i awngphah la la, i ke in kal rawh tih te, I rinna i dampui e tih te, Jordan luiah vawi sarih va inchiah tura a tih te kan hmu a. A tihdam dan chi hrang hrang kan hmu a ni. Amah ring tlata A puan hmawr chauh pawh dek ila ka dam ang ti a kha hmeichhia khan Isua puan hmawr a han dek khan a dam ta mai si a. Anih leh, engvanginnge kei hi ka dam ve loh le? Kan ring lo tih na em ni ta ang! Kan ringa kan dil ve chu a ni miau bawk si a!
Tuarna te, hrehawmna te, manganna te, lungngaihnate leh beidawnna ten min tlakbuak chang hian "ZIR TUR" hi kan lo nei fo thin. Hei hi a pawimawh khawp mai. Hrehawm kan tuar dan te hi zir tham a lo awm tlat a ni. Mipa khat chu zu a in nasat em avangin a pumpui nasa takin a lo lawng ta a, na a ti em em maia, a na alo chhuah chuan khawnge kan in leh mai teh ang, rui law law ila na ka hrelo zawk a ti a, a in leh mai thin. He mihring tuar dan hi a dik lo ani. Lal Isua duh dan anga kan natna te hi kan tuar alo ngai tlat ani. Kan tawngtainaah damna te chu kan dil tur a ni na meuh maia mahse, kan natna hre vek tu ani a ,A duh phawt chuan eng hunah pawh min tidam thei a, min tihdam dan pawh Aman a hre ber a ni. Chuvangin damna kan duha kan dil rual rual hian tuar ala tul hrih anih pawhin beidawng mai lovin Pathian hnenah kan tuarna te hi hmachhawn zel thei turin TAWRHCHHELNA te, RINAWMNA te, HUAISENNA te kan dil theihnghilh loh a tha fo thin a ni. Tuarna phena malsawmna pawh hi chang ve tur chuan kan tuar phawt a ngai a, chu pawh Lal Isua duh dan anga kan tuar a ngai thin a ni. Tuar ve lo te tan tuarna phena malsawmna a awm ngai lo.
Naamana chanchinah khan zirtur tamtak kan nei in ka hre thin. A damna tur chuan Jordan luiah vawi sarih kher a inchiah a ngai a, thuawih takin a va inchiah a, alo dam ta mai anih kha. Keini ve hi chu Naamana nen chuan inanglo tak kan ni in ka hre thin. Naamana ang khan beisei leh ring chungin kan damna tur anih phawt chuan tiin Jordan lui chu rinna in kan han pan ve thin a, chu luiah chuan chiah pawh kan zuk inchiah ve ngei thin. Vawi khat kan inchiah a, engemaw tal ang tawh turah kan inngaia, eng kan lo la ang si lova, vawi hnih kan han inchiah leh a, tlem tal ka dam tawh ang a tiin kan inngaihtuaha, eng kan lo la ang leh si lova. A peih rei deuhin vawi thum vawi li te kan han inchiah leh hram a, hmasawnna engmah kan hmuh loh avangin vawi sarih thleng kan inchiah chhunzawm peih lo fo thin a ni. Hei hi ringtu ten kan tihsual fo thin, kan dam theihlohna chhan pakhat a ni tlat a ni. Thuawih tak leh chhel tak leh rinawm takin hrehawm viau mahse vawi sarih thleng inchiah mai hi kan peihlo fo thin ani. LALPA hnenah dam kan dila, a tirah chuan kan dam theih na turin insum ngai te kan insum a, kan tana tha tur kan ti a, kan tana thalo tur kan ti lo bawka. Tin, Bible te kan chhiar a, kan tawngtaia, kan bethel-a, kan inkhawma, thiante nena awmkhawmnaah kan natna te la dam lo mahse Lalpan ka natna ata thil tamtak min zirtira ka lawm tak tak ani te kan ti duah a, kan lawm rei peih leh chuang thin silo. Ka natna avang hian ka lawm ani te kan ti chawk thina, natna hi a lawmawm em em na ka hre hran lo khawp mai! Bible-ah kan lawmna tur, kan lawm dan tur zawk chu min lo hrilh vek... "Ka lawmna chu Lalpa danah ani si a", a ti mai ani. Natna avanga lawm nilovin kan natna ah Pathian duh dan anga tuarna kan hmachhawn thin avang leh zir tur kan neih te kan han hrechhuaka, Pathian khawngaihna avanga kan zir chhuah te, kan thlarau nun siamthara alo awm leh thin te hi ani lawmawm zawk chu. Amah avangin kan nung, kan che, kan awm a ni si a, Ama tan hian kan nungin, kan che in, kan va han awm lo tehlul em! ti a, kan sualna leh kan bawhchhiatna zawng zawngte avanga inchhira, sima ngaihdam kan dil zawk te pawh hi a ngai fo thin. Kan nitin nun hmanah hian Amah avanga nung, che leh awm kan nih zia ngaihtuah maih lova tal ve tawp hi kan tam viau in ka ring ani. .........la chhunzawm leh tur...
Share
Chhiarzawm rawh
Wednesday, August 11, 2010
Lalpaa awm (Thlarauva awm)
9:12:00 PM |
Posted by
^-||RaLtE||-^
Matthaia 14:24-31...Lawng erawh chu dil lai takah a awm tawh a; thliin a ni lozawngin a nem avangin tui fawnin a vawrh a vawrh ta a. Tin, khawfing chah dawn laiin dil chungah kea kalin an hnen lam a rawn pan a. Tin, zirtirte chuan amah chu dil chunga ke a a kal an han hmuh chuan, "Hmuithla a nih saw!" tiin an thlaphang a, hlauvin an au ta vak mai a.
Nimahsela, Isuan anmahni a be ta nghal a, "Thlamuang takin awm rawh u; keimah ka ni alawm; hlau suh u," ati a.
Tin Peteran a chhang a, "Lalpa, nang i nih chuan tui chunga i hnena lo kal thu mi pe rawh" a ti a. Tin, ani chuan, "Lo kal ta che," a ti a. Petera lawng ata a chhuk a, Isua hnen lam panin tui chungah chuan kein a kal a. Nimahsela, thli tleh chu a hmuhin a hlau va; a pil dawn a, "Lalpa, mi chhandam rawh," tiin a au ta a. Tin, Isuan a ban ta nghal a, amah chu a chelh a, a hnenah, "Nang rin tlem, engah nge i rinhlelh le?" a ti a.
He Bible chang ah hian Peteran Isua lam a en a, rinna nghet tak nen a lam a pan lai chuan tui chungah a ke in pil miah lovin a kal tih kan hmu a. Nimahsela, chutia Isua lam a pan mek lai chuan a vela tui nasa taka fawn te leh thlipui nasa taka tleh mek te a han hriatchhuah chuan a hlau ta a, a hnen lam pawh pan chhunzawm ngam ta lovin a awma, a pil dawn ta mai ani. Amaherawhchu, Lal Isua hnenah tanpui a dil chiah khan Lal Isuan a ban ta nghal a, amah chu a chelh a, "Nang rin tlem, engah nge i rinhlelh le", tiin a hau ta anih kha.
Lalpa kan rin dan leh a rawng kan bawl thin dan te hi han ngaihtuah chiang ta ila. Petera ang hian kan rin Pathiana hi kan ring zo lo fo lo maw te ka ti thin! Theih tawkin a rawng kan bawl ve thin a, kohhran ah te, thalai ah te leh kawng hrang hrangah kan inhmang em em a, a tha e. Nimahsela, ral do lai kan ni tih hi kan in hre lo fo thin niin a lang. Indo laiin sipaite an chawl ngai lova, an hmelma te chu an hneh theih nan theihtawpin an tang thin ang hian thlarau indonaa awm mek kan ni a, hmelmapa setana do mek kan ni tih hi kan inhre lo fo thin. Peteran tui chungah Isua lam a pan lai khan thli leh tuifawn nasa tak a hmu a, a hlauva a pil dawn ta mai ang khan hmelma pa chuan thlemna thlipui leh tuifawn nasa takin min rawn nuai a, min rawn nek sawk sawk a, Lal Isua lam kan pan ve mek lai hian Amahah rinna nghat ngam lovin chauvin kan lo tlu leh thin a ni. Min chhandama min tanpui theitu hnena rinna nghat tlat chunga sual lakah inthiarfihlima kal zel hi kan peih lo fo thin a, he khawvel nawmsaknate leh hlimna chitinrengte kan ngaihtuaha A hnen kan thleng phak lo fo thin a. Amahah kan awm theilo fo thin ani.
Lalpa neih hi tuarna leh channa te, mualphona leh retheihna te chauh emaw kan ti fo thin. Nih na lai pawh a awm awm e. Mahse, Lalpa vanga kan tuarnate, kan channa leh mualphona zawng zawngte leh kan retheihna te hi nakina kan hlawkna tur te, kan hausakna tur te, kan engthawlnat tur te leh kan thlamuanna tur zawk te... lo thi ta pawh ni ila kan hlawkna tur zawk te alo ni fo thin.
Phillipi 1:21-ah chuan, "Kei atan zawng nun hi Krista a ni si a, thih pawh hlawkna ani," a ti a. Nun Krista neitu tan chuan engpawh mai hi hlawkna hlir alo ni. He leia kan damlai pawh hian, nitin sual leh a thlemnate Lal Isua hminga kan lo do va kan lo hneh a, kan lo thih san zel hian thawhlehna nunah chuan kaihthawh leh tih chakin kan lo awm zel alo ni a. He lei taksa hi la thi lo mahse sual kan thih san khan hlawkna alo ni zela, he lei taksa hi a thih tak tak hunah pawh 'Hlawkna, a hnen thlenna, vanrama awm ve na' alo ni dawn ani.
Kan thusawi a fiah zawk theih nan ka chanchin tawi te han zep ve hram ila. Piantirh ata lung pawp ka ni a, wrong treatment- a enkawl chhoh kala ni zui a. Ka chhungte sawi dan phei chuan i tet lai chuan i vun hi tar vun chuar ang mai a ni e an ti thin (T.B. treatment min pe ani). Chutiang chuan kalo thang lian ve zela, kum 8 ka nih in min zai nghe nghe a. Chutia min zai hnu chuan dam pangngai ang chiahin ka lo tha chho ve ta a. Tichuan ka nun chu hmang chho ve zelin sual kawngte pawh thuk tak ka dai chho ve a. KTP angah te pawh Secretary te ni chhovin Central KTP (kan khuaah) ah pawh committee member- te ka ni chho ve a. Tin, kan branch ah phei chuan zaipawl conductor hial te pawh kalo ni chho ve a. Mahse, ka nun ah Lalpa ka nei chuang lo. Lalpa chu ka hria a, ka ring bawka mahse, Amahah ka awm lo a ni. Chawhpawlh nun nei in vei lamin khawvel ka rap a, ding lamin kross kawng chu ka zawh ve bawk thin a ni. A har khawp mai.
Chutiang chuan nupui fanau ka neih thlengin nun chawhpawlh takin ka nung chho ve zel a. Inkhawm, tawngtai, bible chhiar te ti ve thin reng chung si in remchang apiangah sual tih ka hreh chuang lova. Mi mithmuhah ka that ka chhuah a, chhung lamah erawh bawlhhlawh tak ka ni si a. Nimahsela, Lalpa hmangaihna chuan min rawn zilhhau ve ta tlat mai a, Amah ka hnaih theih nan leh A hnena ka kir leh a nun thar kalo neih leh theih nan ka nat a phal ta ni berin ka hria. 2004 kum atang khan nasa takin ka pumpui chu a lo Ulcer ve ta a, doctor tamtak ka rawn tawh a, phai lam pawh ka kal ve nual tawh nghe nghe a mahse, vawiin ni thleng hian damna tak tak ka la chang ta chuang lo ani. Nimahsela, heng natna leh tuarna te phenah hian Pathianin a malsawmna thuruk ropui tak alo dah thin a, chu chuan keipawh min tichak thar leh thin a, he taksa hi la dam hrih lo mahse Pathianah 'Dam Nun' min neih tir thin a, hei hi a ropui ka ti em em a, a hlu em em a ni. Natna avang emaw thildang vanga kan tuarnate hi Pathian duh dan anga kan tuar phawt chuan anin kan tuarna te a hre veka, taksa ah damna min rawn pe nghal lo mahsela, rilru leh thlarauvah damna minlo chantir thin a ni.
"He miteho hian an kain mi chawimawi a, An thinlung erawh chuan mi hlat si," (Matthaia 15:8) ti a kan bible-in alo sawi ang chiah hian ka nun hlui chu alo ni thin a. Pathian mi hmantlak ni si lovin mahni inhmang ka lo ni zawk fo thin. Ringtu te nun pawh hi han bih chiang ta ila keimah ang hi tamtak an awm ang tih a rinawm ani. Lalpaah awm si lo hian A rawng hi kan bawl nasa em em a. Pathian hriattirna atanga rinnaa a rawngbawl si lo hian mahni hriatna satliah, 'Pathian hnen atanga lo chhuak emaw kan tih ve ngawt' atangin a rawng kan bawl vak vak a, Pulpit tlangah thu te kan sawi a, mi te kan counselling-a, tawngtainate kan neihsak luam a, rah chhuah erawh a nei thei lo thin a, thlarau lamah hlawkna leh sawtna pakhat mah kan nei thei thin lo a ni.
Lalpaa awm hi a va han har teh lul em! Nimahsela, ringtute hi Amah kan rinna ringawt hi a tawk si lo. Rinna chu thiltih tello chuan thi a nih zia bible-ah kan hmu si a. Kristian inti tawh phawt chuan Lalpa chu kan ring alawm. Mahse, tih tur kan nei ve tlat. Chu chu a thupekte kan zawma, A thupekte keimahniah a awma, Amaha kan awm tlat hi a ni. Entir nan... naupang pakhat chu an sikul exam alo hnai hle tawh a, Pathian hnenah thahnemngai takin a pass ve ngei theih na turin a tawngtai thin a. Tichuan an exam ta a, result te pawh alo chhuak ta a, nimahsela a lo Fail tlat mai...! Achhan enge kan tih chuan, a exam hma khan Pathian hnenah pass dilin tawngtai tlut tlut thin mahse a pass-na turin a TIHTUR lehkha zir kha alo thlahdah tlat ani. Chutiang chuan tunlaia kan ringtu nun hi a niin ka hre thin. Pathian kan rinna kawngah leh A rawng kan bawlna kawngah hian kan tih tur Bible-in min hrilh ti peih silo leh zawm peih silo hian hmun dangah va rah chhuah phet kan tuma chutah chuan miten min ei lova, a ruk takin hmuhsit leh ngaihnep kan hlawh thin ani. Rawngbawlna a nung thei lova, Pathian nena kan inkar a inzawm thei tak tak thin lo a ni. Kan inkhawma, kan tawngtaia, Bible pawh kan chhiar fo thin, mahse kan nunah ruak a awm tlat a ni. Amahah (Thlarauvah) kan awm loh avangin.
Isaia 45:21 chho ah chuan pathianin, "Keimah lo chu Pathian dang reng reng an awm lo; Pathian fel leh chhandamtu ka ni; keimah lo chu a dang reng reng an awm lo. Kawlkila mi zawng zawngte u, ka lam lo hawi ula, chhandamin awm rawh u; kei hi Pathian ka ni si a, a dang reng reng an awm lo," a ti mawlh mawlh a, chuti chung pawhin kan la ring ngam lo fo thin a, Amahah kan rinna nghat reng ngam lovin kan tluksan fo thin ani.
Engtin nge kan tih tak ang?? Mihring kan nia, chak loh changte chu a awm ve bawk alawm te kan ti fo thin. A dik e. Nimahsela, kan chak loh avangin kan tlu tur a ni kher lo. Tirhkoh Paula chuan,"Ka chakloh apiangin a ni ka chak thin ni," a ti asin! Chuvangin kan famkimlohna leh kan chaklohna te hi chhuanlama hmang mai lovin, kan chak lohna lai tak kha chak nan kan hman thiam a pawimawh hle a ni. Chuvangin, Pathian hnaih hi a tha a, Amaha kan awm tlat hi a pawimawh em em ani. Ni a tha tawh lova, hun a tlem tawh a, chuvangin setana pawhin hun a nei tlem tawh ani tih hria in nasa takin tan a la a, Pathian hnen ata min ruk chhuah a, min tihchhiat vek a,min tih hlum tumin min bei mek a ni tih hi i hre nawn fo ang u. Indo laiin chawlh a awm si lova, Lalpa a chawl lova, setana chawl bawk hek lo.
"Nangnin mi thlang lo, keiman ka thlang zawk che u, va rah tur leh in rah te awm reng turin ka ruat bawk a che u; ka hminga Pa hnena in dil apiang a pek theihna tur che u in," ti in bible thianghlimah min lo hrilh daih tawh.(Johana 15:16) mahni ta pawh kan ni tawh lova, mana lei, A thisen hlutaka a tlante kan nih hi i inhre nawn fo ang u. Hmalam pana mahni hrehawm pawisa lova nitin mahni kros pua kan kal mek lai hian damchhung nawmsaknate hian i inngaihtuah buai lovang u. Ei leh in, silh leh fen, awmna tur in leh lo te aiin Nunna, Chatuan Nunna kan neih theih na tur hi a hlu zawk daih si a. Chuvangin A ram leh a felna zawng hmasa ila, Lalpan kan mamawhte a hre veka, min pek belhchhah mai dawn ani.
"Lalpa chuan, 'Mi tinreng ka hmaah an kun anga, lei tinreng pawh Pathian hnenah a inpuang ang," a ti a (Rom 13:11). Chuvangin, sual ngamin i awm lovang u, kan chak zawng tak hmangin emaw, thil tha lo, a tha lo ani tih kan hriat reng pawh tih chak tlat na alo pian hian Lalpa hnenah tlu lut vat ila, tichuan Lalpa hmingin hnehna chu kan chang thei dawn a ni.
Chaklo tak leh tlinglo takin Lalpa hnenah a rawng chauh bawl turin kan inpe tawh a, a kim lovin kan hria a, a kim lovin kan hrilh bawk thin. Chuti khawpa chaklo leh famkim lo chunga a rawng kan bawl tawk tawk lai pawha chakloh leh zualna tur kan insiam fo thin hi i sim ang u. Thatnain sual chu hneh tur kan nih laiin sualna vek in sualna chu hneh kan tum fo thin. Kan thin te a rim a, anchhia te kan lawh bawrh bawrh a, mi te kan rel chiam thin.
Rorelna niah chuan Pathian hnenah kan chanchin theuh kan la sawi dawn si a. Chuvangin kan nun kan hman dan theuhvah hian fimkhur ila, Lalpa kan hnenah a awm reng ani tih hria in 'kan buan mek te hi kan hneh theih nan IKorinth 16:13-ah a sawi ang khan "Inveng ila, rinnaah chuan ding nghet ila, intihuai ila, chak takin i awm zawk ang u, Lalpaah i awm tlat ang u."
Lalpan a thu te malsawm rawh se. Amen.
Share
Chhiarzawm rawh
Aw Lalpa, min ngaidam mawlh ang che!
2:11:00 PM |
Posted by
^-||RaLtE||-^
Ka duh danin I rawng ka bawl thin a,
Tha ka tih danin ka pen fo thin.
Ka ka in ka chawimawi che a,
Ka thinlung erawh chuan a hlat si thin che Lalpa!
I ropuizia min hmuhtir thin a,
I rinawmzia min hriattir fo thin.
Mahse, harsatna leh manganna ten min rawn chima,
Nang ka ring ngam leh thin lo che Lalpa.
I rawng chauh bawl turin ka inhlan a,
Ka theih tawkin ka pen ve thin.
Mahse Nangmahah nun nghet
Ka neih loh avangin,
Rah chhuak nun ka nei thin lo.
Tisa dan in ka awm a,
Tisa ah pawh ka awm fo thin.
I rawng ka bawl lai pawhin,
Chapona rilru ka nei fo thin.
Mahni kros pu zo si lo hian,
Midang kros erawh ka pu kang fo thin.
Ka theih tawkin ka pen ve thin.
Mahse Nangmahah nun nghet
Ka neih loh avangin,
Rah chhuak nun ka nei thin lo.
Tisa dan in ka awm a,
Tisa ah pawh ka awm fo thin.
I rawng ka bawl lai pawhin,
Chapona rilru ka nei fo thin.
Mahni kros pu zo si lo hian,
Midang kros erawh ka pu kang fo thin.
Aw Lalpa, min ngaidam mawlh ang che.
Aw Lalpa min ngaidam la,
Nun nghet, nun tak, nun Krista
Nei turin simin I hnen ka rawn pan e;
Chatuan nun kawngah chuan min hruai la,
I ropui nan chauh ka nung zel tawh ang.
Share
Nun nghet, nun tak, nun Krista
Nei turin simin I hnen ka rawn pan e;
Chatuan nun kawngah chuan min hruai la,
I ropui nan chauh ka nung zel tawh ang.
Chhiarzawm rawh
Sunday, August 08, 2010
Pathian thilsiam setanan hmanrua-a alo hman ve dan
10:55:00 AM |
Posted by
^-||RaLtE||-^
Sam 24:1 ah – “Leilung leh a chhûnga thil awm zawng zawng hi LALPA ta ani a; Khawvel leh a chhûnga chengte nên hian,” tih kan hmu a. Nimahsela hmelmapa setana hian a ma ta pakhat mah a neih ve loh avang hian Pathian ta leh a thilsiam zawng zawng hi a va han tawmpui nasa tehlul em tih ka ngaihtuah thin! Kan nitin zantin nunah leh hun hman ah te leh kan neih thilah te hian thiam takin alo inrawh ve zel mai alo ni. Pastor emaw, Kohhran upa emaw rawngbawltu emaw tumah hmaih bik maw a nei hauh lo. Setana mizia leh a tactic leh a hamnrua te hi kan hriatchian a tul hle awm e.
A tawmpui dan chi hrang hrang tawi te in han tarlang tai le:
1. Mihringah: Pathianin a duh taka a siam mihringah chuan kan thinlung a rawn tawm a, tichuan chu thinlung atang chuan “ngaihtuahna sualte, tualthahnate, uirenate, inngaihnate, rukruknate, heknate, sawichhiatnate a lo chhuak si thin a;” (Matthaia 15:19). Mi te angin sual langsar tak takte ti ve lo mah ila, bible-in a sawi ang hian thil thalo tak tak te kan ngaihtuah fo thin a, kan sawichhuak fo thin a ni. Ephesi 4:31-ah chuan, “Khakna te, thinurna te, tauhna te, anna te, sawichhiatna te zawng zawng chu bansanin awm rawh se, sualna zawng zawng nen,” a ti a. Chuvangin heng zawng zawng hi kan ching reng anih chuan rinna kawngah leh rawngbawlna kawngah than len a har hle awm e. “Sual ngam chein awm suh la, thatnain sual chu ngam zawk rawh,” ROM 12:21-a a sawi ang hian hetiang anga kan thinlunga thil alo thlen hunah chu sual chu thatnain kan do a, hnehna Pathian hminga kan puan zel a pawimawh hle a ni.
2. Thilsiamah: A chunga kan tarlan tak ang khian leilung leh a chhunga thil awm zawng zawng hi Pathian ta vek, a siam vek a ni tih kan hmu a. Pathianin mihringah finna a dah hmanga thilsiam chhuah zawng zawngte pawh hi Pathian ta vek a ni a, Pathian siam vek a ni tih kan hrechiang theuh awm e. Hmanlai thilte chu lo dahtha rih ila, tunlai khawvel thiamna leh finna hmanga thilsiam chhuah zawng zawngte hi i han thlir ho teh ang…
(a) TV, Mobile, computer, etc. An tangkaina zawn ah chuan thil tangkai tak vek an ni tih kan hre theuh awm e. TV atangin khawvel hmun hrang hranga thil thleng te leh kan la hmuh ngailoh te kan hria in kan hmu thei a, a bengvar thlakin hriatna a ti zau em em a. Nimahsela, hei pawh hi setanan a rawn tawmpui chiah chuan inkhawm thulh phah nan te kan lo hmang ta zela. Khawvel hla maksak tak tak en nan te leh sual zir chhuahna remchang tak tak film en nan te kan lo hmang ta a. Chutiang bawkin Mobile te pawh a lo ni ta zela. Chanchin inhrilh nan leh thil pawimawh tak tak inhrilh nan te leh phone hmanga midang counseling nan te leh tawngtaisak nan te hman theih/thin a nih lain setanan a rawn tawmpui chiah chuan milem bawlhhlawh tak tak en nan te, khawvel hla- thlarau nun chawm lem lo ngaihthlak nan te tin, tunlai lar em em sex video capture nan te hman a lo ni ta zela.. Computer lah chuti bawk… Film bawlhhlawh tak tak te leh hla thalo tak tak ngaihthlak nan mai bakah setatana a inrawlh tawh chuan Internet hmangin thil thalo tak tak tih nan te mi in an lo hmang ta a. Chu mai bakah tunlai phei chuan naupang atanga puitling thlengin an atchilh em em game te hi ang tak takin an lo siam chhuak zela, thisen chhuah bur bur na lampang te, thlahrang lampang te, misual nun lampang game te khelh nuam an lo ti em em ta zel a ni. Hei hian naupang atanga puitling thlengin luhlulna kawngah te, mi kutthlak ve duh mai na thinlung te a siam a, a hlauhawmin a thalo hle a ni. Thil tamtak a awma, kan sawi seng lovang. I chhiar atang ringawt pawh hian thil tamtak sawi tur i hriatbelh teuh ang tih a rinawm a ni.
(b) Fashion-ah: Kan ram pawh fashion-ah kan sang ve ta hle mai. Thil tha tak a nih rual rualin setanan a tawmpui ve zel thin avangin fimkhur erawh a ngai hle thung. Kan incheina thawmhnaw mai bakah thi, bengbeh, ngun, zungbun, kawnghren, etc. te pawh a hmang ve zel ani tih kan hriat a pawimawh awm e.
Tunlaiah tleirawl leh thalai tamtak ten intih pa na emaw tiin T-Shirt tial mak deuh deuh – luruh lem, thuziak rapthlak tak tak te, setana sign te, setana lem ni awm tak te hak an chinga a pawi ka ti thin hle a ni. Tamtak chuan a awmzia em em pawh hre lovin an ha a, a then erawh chu setana hnenah pawh lo inthawi tawh hial te an ni thin. Anton Lavey-a, Setana kohhran hmuchhuaktu khan rock music mai bakah hetiang fashion thleng hian mi tam tak hip khawm nan bul a lo tan daih tawh a. Hetiang sign and symbol te hi thi ah te, bengbeh ah te, zungbunahte, T-Shirt-ah te kawnghren ah te leh tattoo ah te alo thehdarh nasa tawh mai a. Heng an thehdarh ho reng reng hi an commercialized hma in setana hnenah an inthawi a an hlan phawt thin a ni. Chuvangin miin hetiang kan sawi tak ang ho hi a lo neih chuan, rinna lama chaklo tak anih phei chuan setana hnena hlan tawh thil te anih avangin setana anchhia (curse) a awm thin a, natna hmangte leh thildang dang hmangin mi a tibuai thei a, a vanduai zual te phei chu setanan a luhchilh hial thin a ni.
Sawi zel dawn pawh ni ila kan sawi seng dawn chuang lova, chuvangin kan nitin hun hmanah te kan fimkhur a ngai nasa lehzual tawh a. Kan sawi tawh angin setana hian ruihtheih leh hurna piah lamah hian kan thil neih te nen lam hian hmanrua ah a hmang thin a ni tih kan hmelhriat a pawimawh hle a ni. Pathian lak ata min ruk bova, kan nun min tihchhiat veka, min tihhluma hremhmuna min hruai hi a tum ber anih avangin second tin maia kan nun hman hi fimkhur tak leh Pathian tih dek chunga kan awm reng hi a pawimawh em em a ni.
“Chuvangin, nangni pawh inring rengin awm rawh u, in rin loh hunah Mihring Fapa a lo kal dawn si a.” Matthaia 24:49 – a kan hmuh ang hian englai pawhin inring renga kan awm tlat a pawimawh a, thlemna kan tawh hunah pawh tlu mai lovin Pathian hminga hneh zel a pawimawh a, sual lakah kan inthiarfihlim a pawimawh takzet ani.
Share
Chhiarzawm rawh
Monday, August 02, 2010
A sawm che!
3:48:00 PM |
Posted by
^-||RaLtE||-^
Kum 2000 khan phai ah lekha zira ka awm laiin nikhat chu ka khua a har em em maia. Ka nun hman dan te thlir kir in ka rilru chu ka kawm melh melh a. Kohhranah rawngbawl thulh chuang si lovin, nun chawhpawlh taka ka khawsak zia te, Pathian ka lo hlat tawh zia te chu ka inhre chhuak ta a. Ka nun a tuihalin a chau em em ani tih ka hria a, Pathian ka au va, ka tawngtai bang lova. Ka suahsualna zawng zawng te avangin ka inchhir em em a, Pathian hnenah ngaihdam dilin ka tawngtai leh thin a.
Thlarau Thianghlim pawl tharna te dil in thupha chawi chung zela ka hun ka hman lai chuan Pathian pawlna duhawm tak mai chu ka thinlungah a lo thleng ta a! Hla thu tha zet mai hi ngaihtuah lawk awm miah lovin ka thinlungah min rawn phuah sak/pe ta a. Pen leh lehkha ka la vat a, engmah rilrua ngaihtuahna seng miah lovin he hla hi vawilehkhatah lawm avanga mittui tla chungin ka ziak chhuak ta a ni.
I nun lo beidawngin chau thin mahse
Kal ngaihna hre lovin bo thin mah la
A sawm reng che asin a aw nem in!
Lungngai-manganga i rum thin lai leh
I rinna chak lova i phatsan lai pawhin
A nghak reng che asin a aw nem chuan!
Lo kir rawh a angchhungah
I mittui te chu a lo hru fai ang
Bo leh tawh lo turin a lo kai ang che
Tunah ngei hian...
A sawm che...
Kir tawh lo tura i tawngtai khan
I hnenah ka awm reng asin
Mittui nen inchhira thupha i chawi lai khan
I hnenah ka awm reng asin
Mahse thlemna tuifawn karah
Min hawikir san leh ta si
Thinlai a na ngei e
Aw, ka fa lokir leh mai rawh
Ka aw nem chuan a sawm che
Bo leh tawh lo turin ka lo kai ang che...
Lo kir rawh ka angchhungah
I mittui te chu ka lo hru fai ang
Bo leh tawh lo turin ka lo kai ang che
Tunah ngei hian...
Ka sawm che...
Tichuan, he hla thu hi ka thianpa Eddie-a (tunah chuan USA lamah nupui te neiin rawngbawlna pawimah tak a thawk mek) chuan a thluk mawi tak mai in min han phuah sak ta a. Music For Christ album-ah zeh tel a lo ni ta nghe nghe a ni.
A hla hi mp3 in download theih turin ka rawn chhawp a. Duh chuan Online pawhin a ngaihthlak theih tho e. A hnuaia link hi lo click zeuh mai rawh le...
Chhiarzawm rawh
Thursday, July 29, 2010
Awm hranna
9:33:00 PM |
Posted by
^-||RaLtE||-^
Awm Hranna awmzia chu khawvel thil leh nun atanga, a hnen lama awm tura Pathianin a Fapa Lal Isua chhandamna hmanga a ‘kohchhuah’, ‘Awm hran tir’ te nun sawina a ni. Pathian hian khawvel mite leh an thil tih te lak a min awm hran tir hian chhan leh vang a nei thin a, hmanrua pawh a hmang bawk thin a ni.
THUTHLUNGHLUI MITE:
Abrahama kha Pathianin Haran khua atanga a koh chhuah khan ti hian a sawi a, “I khaw lam ata leh i laichinteho zing ata leh i pa in ata chhuak la, ram ka la entir tur che lamah kal rawh” (Genesis 12:1-2). Pathianin a koh chhuah chhan chu ‘ram ka la entir tur che lamah kal rawh’ a tih vang a ni a. Lota leh a chhungte kha Sodom khaw kang tur lak atangin an kutah a chelh a, a hruai chhuak a. (Genesis 19:16)
Israel fate kha Pathianin, “Nangni chauh hi khawvela chhungkua zawng zawnga ka hriat in ni a, (Amosa 3:2) a tih vangin, Josefa leh a chhungte chu Gosen ramah Aigupta mi te nen a in awm pawlh lo turin ram a pe bawk a (Genesis 47:6). Malsawmna an dawn theih nan, “An zing ata lo chhuak ula a hrangin awm rawh u” (IIKorinth 6:17) ti in Jerusalem sualna laka inthiarfihlima, a lawm zawnga nung turin a ko bawk a. Tichuan, Pathianin Israel fate chu ei leh in tur chenin a ti hrang hial a. (Lev. 11:1-47) Thlarau lam nun atan pawh Dan zawm tur a pe a ni (Exodus 20:1-17).
THUTHLUNG THAR MITE:
IPetera 2:9-ah chuan ti hian kan hmu a, “nimahsela thim ata chhuaka a eng maktak a lut tura ko tu che u thatna chu in entir theih nan nangni zawng chi thlan, Lal puithiam ho, hnam thianghlim, Pathian mi te ngei in ni si a”. Hei hian thuthlung thar fate chu Pathian ta leh a khua leh tui ni turin fapa Isua Krista hmangin min ko tih kan hmu a ni. “In thi tawh a in nunna chu Pathianah chuan Krista hnenah thuhrukin a awm si a” (Kol. 3:3). Thuthlungthar fate chu, “kros chuan khawvel nen min ti hrang ta”, tiin “Awm hranna” chu a lo thleng ta a ni.
ENGTIA AWM HRAN TUR NGE?
1. Van mi anna nun vangin: “Tin, leia siam mi anna kha kan put angin, vana mi anna chu kan pu bawk dawn a ni (IKor.15:49). Lal Isua chhandamna avang chuan mithianghlim te nen chuan tualkhat leh Pathian chhungte kan ni ta zawk a. (Ephesi 2:19) A nih na diktak chu, ‘he lei ram mi kan ni lo, khualzin kallai mek kan ni’ tih hla ang hi a ni. Chuvangin, Lal Isuan tawngtai dan min zirtir pawhin, “I duhzawng vanah an tih angin lei a min ti rawh se” (Matthaia 6:10) ti tur in awm hranna nun chu a rawn sawi hial a ni. Kan awm dan leh rilru put hmang te chuan van lam thil ngaihtuah i la, ‘I ro awmna apiangah i rilru a awm thin’ tih a ni si a.
Khawvel thil in min chiahpiah thin mah sela, chung lama rilru nghah tlat na nun ‘awm hranna’ avang chuan vana mi anna nun chu vawnhim a tul thin. “Chutichuan Krista hnenah kaihthawhin in awm ve tawh chuan chung lam, Pathian ding lama thu Krista awmnaa thil awmte chu zawng rawh u” (Kolossa 3:1-2).
Van mi anna nun hrang kan neih lai hian thlarau do thintu tisa chaknate chu bansan a lo tul a, chu bansanna nun chu awm hranna nun ze dik tak chu a lo ni. “Duh tak te u, mikhual leh khualzin in nih avangin, thlarau do thintu tisa chaknate bansan turin ka ngen a che u. (IIPetera 2:11)
2. Nun leh thiltih ah: Piangthar mi ze hluia nung reng leh danglamna nei lo chu awm hranna ah a awm lo a ni. “…mihring hlui chu a thiltihte chawpin in hlip tawh a, mihring thar chuan in inthuam tawh si a, chu mihring thar chu hriat famkimna nei turin a siam tharin, a siamtu anpui anga siam thar in a awm mek a ni. (Kolossa 3:9-10) Pathian pawh khawvel mite hnenah a cheng lova, kan danglamna chu a hranga kan hnena a awm thin hi a ni a (Exodus 33:16), chutiang bawk chuan aman min serhhran, awm hrantir tawh avangin kan chetzia, nun leh thiltih pawh a hranga langchhuak tur a lo ni thin (IIKorinth 6:14, Ephesi 2:11).
A tlangpuiin hengte hi tih loh tur a ni:
1. Inngaih leh bawlhhlawh zawng zawng
2. Duhamna pawh lam loh tur
3. Zahmawhte, thu lawi lo sawi te, fiamthu te pawh
4. Ringlo mite nen rual lo taka nghawngkawl bah dun loh tur.
3. Nun Krista: Galatia 3:20-ah chuan, ‘awm hranna’ nun chu ti hian a sawi a. “…nimahsela ka nung a ni; keimah erawh chu ka ni tawh lo; Krista chu keimahah a nung zawk a ni…”. Tunhmaa khawvel tana nung kha ‘Krista tan’ a lo nungin a lo awm hrang ta a. Khawvela a awm lai chuan khawvel atangin khawvel tan a nung a, Krista ah erawh chuan Krista avanga nungin Krista tan a nung a ni. Ringtu tam tak an nunna innghahna khawvel thil la ni tlat te leh an nunna pawh khawvel nen la inkaihhnawih tlat a awm fo thin. Chuvangin, khawvel a tan khenbeh a awm a, amah pawh khawvel tan khenbeha awm Kros nun (Galatia 6:14) nun neih a tul ani. Kan thiltih leh duhzawng chuan khawvel pawhin chutiang ni a min ngaih theih loh tura nun a pawimawh thin.
Khenbeh nun chuan awm hranna min pe a. Kan taksa duhzawng leh thiltih pawh a lo danglam ngei ngei thin. “In taksa pengte pawh fel lohna hraimhrei atan sualna hnenah pe phal hek suh u, amaherawhchu, mitthi zing ata nung leh angin Pathian hnenah inpe ula, in taksa pengte pawh chu felna hriamhrei atan Pathian hnenah pe phal zawk rawh u” (Rom 6:13).
4. Awm hran hlenna: Khawvela kan awm laia khawvel thil, tisa thil laka awmhranna chuan thih hnuah Pathian rorelna hmaah awm hranna ah a hruai dawn a. He khawvel sual leh a thiltihtheihna atanga awm hrang lo tu te chu awm hranna tawng mahse chatuan hremhmuna awm hranna a ni thung dawn a ni. “Khawvel tawp hunah chuan chutiang bawkin a awm ang; Vantirhkohte chu an lo chhuak ang a, mi fel zing ata misual chu an hlir ang a” (Matthaia 13:49). Beram leh kel angin a thliar hrang bawk ang (Matthaia 25:32-33). Hemi hunah hian ringtu Pathianin a kohchhuah, “An zing ata lo chhuak ula, a hrangin awm rawh u”, a tih zawm tu te chu Pathian hnenah an awm hrang hlen tawh dawn a ni.
Sawiho tur:
1. Khawvel nen kan inchiahpiah hle a, kan nun leh thiltih hi a hrang em?
2. Fiamthu thianghlim a awm em? Sual te leh sual lian a awm em?
3. Khenbeh nun (kros thu) hi mahni nun theuh ah a takin lanchhuahtir in kan inhria em?
Share
Chhiarzawm rawh
Natna hi sual a ni em?
9:48:00 AM |
Posted by
^-||RaLtE||-^
Johana 5:14…”Ngai rawh, i dam tak hi, thil tisual leh tawh suh, chutilochuan thil tha lo lehzual i chungah a lo awm dah ang e,” a ti a.
Natna mihringa lo thleng thin/awm thin hi a chhan kawng thumin hetiang hian han then ta ila:
1. Insum loh, fimkhur loh, tlang hri leng, accident, etc.2. Pathianin mi a thunun nan emaw fiah nan emaw vanga natna a pek (Israel fate).
3. Setana atanga chhuak natna. (Joba nun)
A chungah kan tarlan tak ang khian natna mihringa alo thlen dan chu kan hre fiah thei awm e. Mi thenkhatin natna alo thlen hian setana tih nat ah ngai in tawngtainaah te setana an hau chiam thin a, a ti na tu setana kha hau la damna puang rawh te an ti fo thin. Suahsualna avanga na nge setana tih nat nge an nih Pathian thununna an chungah alo thleng nge, anih loh leh tlang hri leng leh thil dang dang vang tih te hriatsak phawt a tha awm e.
Lal Isua khawvela alo kal lai khan natna chi hrang hranga na te a tidam thin a, ‘tisual leh tawh suh’ te a ti fo thin tih kan hmu a. He, Johana 5:14-a kan hmuh Bethesda dila damlo a tihdam pawh hi thil tha lo lehzual a chungah a lo thlen loh nan tisual leh tawh lo turin a fuih a ni. Bible hrilhfiahna tamtakah he damlo hian thil a tihsual avanga kum 38 ngawt a damloh phah na chhan sawi na a awm hran lo va. Nimahsela, tupawh mai hi Pathian mithmuh leh hriatah chuan misual kan nih zawk avangin he pa pawh hi tisual leh tawh lo turin a hrilh mai anih a rinawm.
Kawng lehlamah chuan, kristian ni mah ila Pathianah nun nghet tak neih loh chuan inkhawm, bible chhiar leh tawngtai te hi ti ve thin bawk mah ila, sual tih na remchang kan hmuh chuan kan ti hreh lo fo thin. Ruihtheih thil te leh sual chi hrang hrang te ti reng chungin pawnlang nun erawh kohhran mi tak, Pathian ngaihsak tak anga lan kan tum fo thin. Hetianga chawhpawlh taka kan nun thin na hian kan sim chuan si loh chuan kan ruihtheih leh sual chi hrang hrang chin thin te chuan min vaw let a, natna khirhkhan tak tak te kan tuar ve fo bawk thin. Natna chi hrang hrang kan chungah alo thlen hian thenkhat te chu Pathianah an inhmuhchhuah phah a, an sualte an sim a, an awmdan tha lo te an bansana, Pathian an hnaih phah thin. Thenkhat ve thung erawh chu Doctor-te leh Pathianah beiseina sang tak neiin an dam ngei an ringa nimahsela, an dam chuan si loh hian beidawnna sualah te an tlu lut fo thin bawk.
Pathian mihriat emaw Pathian mi hman emaw rawngbawltu emaw nih tawh phei chuan A tihdamna chan tawh hnua tluksan leh chu kan Bible chang innghahna a mi ang hian a aia thalo lehzual hi a thleng duh khawp in a rinawm a ni. Keipawh Pathian hminga ka sima, ngaihdam ka dil hnu ah Pathian tihdamna ka changa mahse khua a lo rei a, kalo bawhchhiat leh avangin a aia nasa lehzualin tun thleng hian kala na ni in ka hre fo thin.
Natna hrim hrim hi sual a ni lo va nimahsela, kan natna chhan zawka kha sualna avang te, setana natna min pek te emaw Pathianin min thunun nana min tih nat te emaw thildang dang vangte a ni fo zawk a ni.
Engpawhnise, ringtu kan nih avangin kan na thei lo tih na a ni lo va, manganthlak tak leh tih ngaihna awmlo khawpa kan lo na anih pawhin Lalpa chu kan hnenah a awm renga, a hnai reng a ni tih hi kan hriat fo a tha a, Lalpaah dam nun neih zir a tul fo thin. Hosea 6:1-ah chuan, “Hawh u, LALPA hnênah i kîr ang u: Min lo pawt sawm tawh na a, min tidam leh dâwn si a, Min lo vaw tawh na a, min tuam leh dâwn si a”, a lo ti hial ani.
Sawiho tur:
1. Natna hi sual a ni em? Nge sual vangin kan na zawk?
2. Natna lo thlen dan ni a kan hriat te sawi ni se.
3. Natna/tuarna hian Pathian min hnaih tir em? Kan dam chuan si loh hian Pathian min hlat tir tu, min ti beidawng zual mai mai tu a ni zawk em?
4. Natna hi engtia tuar/hmachhawn tur nge?
Share
1. Natna hi sual a ni em? Nge sual vangin kan na zawk?
2. Natna lo thlen dan ni a kan hriat te sawi ni se.
3. Natna/tuarna hian Pathian min hnaih tir em? Kan dam chuan si loh hian Pathian min hlat tir tu, min ti beidawng zual mai mai tu a ni zawk em?
4. Natna hi engtia tuar/hmachhawn tur nge?
Chhiarzawm rawh
Subscribe to:
Posts (Atom)
Page visited since May 29,2001
Ka tlawh thin te:
-
-
-
-
-
Chp 921. Why I'll Never Be a Good Farmer2 months ago
-
To you - my children....13 years ago
-
Phone Hack ang aw....14 years ago
-
Mizo Ten Diar Kan Khim Thin6 years ago
-
-
