Thursday, July 29, 2010

postheadericon Piantharna

9:19:00 AM | Posted by ^-||RaLtE||-^

Johana 3:7 “I pian thar tur ka tih che hi mak ti suh.”

Piantharna chu enge?
‘Piantharna’ tih awmzia chu Lal Isua Lal leh chhandamtu ah pawma, tuiah leh thlarauva pian thar tih na a ni (Johana 3:5). Tui hian silfaina a entir a. Tin, thlarau hian thiltihtheihna a entir a ni. Chutichuan tui leh thlarau chuan Lal Isua zarah kan suahsualna te chu min tlen fai sak a, hnehna min chan tir thin a ni.

Piantharna chuan he khawvel dan leh sualnate lak ata min then hranga, Pathian duhzawng leh lawmtlak ni turin Krista zarah min siamthar a ni (Rom 12:2). Chuvangin piantharna chuan mi tupawh a ngaihtuahna ah te, a thusawiah te, a thiltih ah te leh a nun ah te Pathian hre rengin, Pathian ropui nan a ti thin a ni.

Pianthar a tulna:

Rom 5:12-ah chuan, “Chutichuan mi pakhat avangin sual khawvelah a lut a, sual avangin thihna a lut bawk a, chutiang bawkin mi zawng zawngin thil an lo tihsual avangin thihnain mi zawng zawng a fan chhuak ta a”, a lo ti a. Eden bawhchhiatna avanga misual kan lo nih tawh avang leh Sam ziaktu pawhin a sawi angin khawlohnaa din kan lo nih avangin piantharna chu kan chan a lo tul ta a. Johana 3:1-7 ah khan Lal Isuan pharisaite zinga mi Juda hotu pakhat Nikodema hnenah, “I piangthar tur a ni", tiin a hrilh a, a chhan chu chhandama kan awm theih nan leh Pathian rama kan luh theih nan a ni. Isaia 53:6-ah chuan, “kan za hian berâm angin kan vâk bo va; mahni kawng kawngah kan peng theuh va…a ti a, hetiang anga boralna kawng zawh mek kan nih avang hian kan pianthar a lo tul ta a ni.

Piantharna dik leh diklo:
Mi in piangthar a nih a in hriat loh emaw chhandam anih a inhriatloh na chhan chu a duh loh vang emaw, Pathian thu a hriat loh vang emaw, Lal Isua lal leh chhandamtuah ala pawm loh vang emaw a sualte ala sim loh vang emaw te a ni thei. “Thil ka tisual lo, kan tih chuan amah chu dawtheiah kan siam a, a thu pawh keimahniah a awm lo a ni” (IJohana 1:10).
 

Piantharna hi Baptisma chan emaw, kohhran leh thalai pawla inhman emaw, nun siamthatna emaw, thil tha tih tam emaw, kan thil thalo tih thin te sim emaw, tanpui ngaite tanpui emaw mai a ni lova, kan nun hlui leh suahsualna zawng zawngte bansana, sima Pathian hnena kir a, tuiah leh thlarauvah kan pian thar hi a ni zawk a ni (Johana 3:5).

Lal Isua tel lovin a pianthar theih em?
In ti piangthar tha tak, in ti Pathian thu awih tak, thlarau mi ni awm tak anga lang, nun ah ei tur awm si lo, rah chhuak nun nei si lo tamtak sawi tur an awm awm e. Johana 14:6-ah chuan “Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo…” a ti a. Chuvangin mi in a awm dan te bansana, sim a Lal Isua hnenah a hawikir loh chuan a nun ah Lal Isua a lal loh avang leh nun Krista a neih loh avangin a piangthar lo a ni. Tirhkohte 4:12-ah chuan, “Mi dang tuma hnenah chhandamna a awm lo; van hnuaia mihring sak zingah, min chhandam tur hming dang reng a awm lo,” a ti nghe nghe a ni. Chuvangin Lal Isua atang chauh lo chuan piantharna dik a awm ngai lo.

Piantharna chu tu tan nge?
Piantharna chu mi tin tan a ni a. Tupawh amah ring apiang an boral loh va chatuana nunna an neih zawk nan leh tuihal apiang tan piantharna chu a chan theih a ni (Johana 3:16 / Johana 4:10).
 
Engtinnge kan pianthar ang?
Lal Isua zarah he khawvelah hian kan lo piang chhuak ngei a nimahsela chu piantharna chang tur erawh chuan kan duhthlannaah a dah tlat a ni. Lal Isua’n tumah piangthar turin min nawr lui lo va, a duh apiang te erawh an sual te a ngaihdam sak in a siamthara, a fa ni turin a dinthara, a chhandam thin a ni. Chu chhandamna chu Pathian thilthlawnpek ropui tak a ni a (Rom 5:15), a thisen hlutak chuan min tlan a ni (IPetera 1:18-19).

Mi thenkhat te erawh chu an sual em avangin an inchhir chang pawhin Pathianin a ngaidam duh tawh dawn lo ni ten an inhre fo thin a. Chutiang zirtirna diklo tak tak pawh a awm fo thin. Nimahsela, Pathianin sual ngaihdam duh loh a nei lova, setana bia a inthawi thin te thlengin ani chuan a ngaidam thin a ni. Sam ziaktu chuan, “LALPA chuan thinlung lungchhiate chu a hnaih thin a, Rilrua inchhir apiangte chu a chhandam thin” (Sam 34:18) a ti a ni.

Lal Isuan kan sualte avanga ngaihdamna kan chan theih nan leh chhandama kan awma a thlarau thianghlim kan chan theih nan kan tuar ai tuarin a thi a. Chuvangin, nunna kan neih theih nan a nun min petu Lal Isua Krista chu sual kawng leh setana duhzawng te aiin kan thlan a lo tul ta a. (Johana 1:12) “Nimahsela amah lawm apiang chu, an hnenah Pathian fate nih theihna tur a pe, a hming ringtute chu;” tih thu kan hmuh ang hian inchhira kan sual te kan sima, Pathian kan rina, kan awmdan thalo zawng zawngte kan bansana, Lal Isua Lal leh chhandamtuah kan pawm alo ngai ta a, chutah chuan piantharna chu Krista zarah kan lo chang dawn a ni.

Tlangkawmna:
Mi kan lo pianthar hian thlarau thianghlimin min khawih a, a awmpuina leh chenchilhna te kan dawng thin a, min tanpui thin a, a thu chhiar leh zir kawngah te, tawngtai kawngah te, rawngbawlna kawngah te nasa lehzualin min ti chak fo thin. Hei hian Pathian hriatchian lehzualna kawngah te min hruai a, kan thlarau nun te leh rinna kawngah te min ti chak a, kan nun min ti nghet a, sual thlemna eng ang pawh tawk thin mah ila Lalpa hming avangin hnehna kan chang thei fo thin. Tin, midang, rinna kawnga chau tak te leh sual kawng zawh mekte pawh piantharna kawng leh nun nghet, nun tak, nun Krista nei thei turin kan lo kaihruai thei fo thin a ni. A tawp berah chuan, vanram min thlentu, chatuana nunna kan neih theih na tur anih avangin kan pianthar a ngai a ni.

Sawiho tur:
1. Tuiah leh thlarauvah tih hi sawiho ni se.
2. Engtin nge tuiah leh thlarauvah kan pianthar ang?
3. Vawi khat aia tam a pianthar nawn theih em?
4. Piang thar teh na tha ber enge ni?
 Print this post Share
Category:

0 comments:

Post a Comment

Subscribe to: Post Comments (Atom)

Sam 66:18

"Ka thinlunga sualna ka ngaihsak chuan Lalpan mi ngaithla lovang:."

Zawnawlna...

Page visited since May 29,2001

Templates designed by David L. Ralte.

back to top