Tuesday, November 23, 2010
Satanism in Mizoram!
2:55:00 PM | 
Posted by
^-||RaLtE||-^
Kan ramah hian satanism chungchang hi kan media-ah te leh thuhriltu engemawzat te hian an sawiin an chhuah ta fo mai a. Awih lo fe fe tamtak an awm laiin awih pawh kan kat nuk a. Setana kohhran lo indin chhoh dan, Anton Lavey tih vel erawh sawi ka tum lo. Ka sawi duh zawk taka chu kan ram, Mizoram, ringtu za a za awmna intihna ramah hian satanism hi a awm tak tak a, setana hnena mahni taksa zai a thisena inhlan/inthawi thin te hi an awm tak zet zeta, chutih rualin in lak pa nan emaw, mite attention hip nan lo inti satanic ve em em te pawh an awm tho mai.a
Kei ngei pawh hian kum thum chuang zet chu heng ho hi kalo hmachhawn ve tawh a, Pathian khawngaihna zarah chhanchhuahna chang pawh an awm ve nual tawh nghe nghe a ni. Chuvangin titi leng vel atanga ka hriat leh ka zeldinna atangin ka ziak dawn lova, keimah ngeiin a takin kalo experience tawh avangin anmahni ka kawm thinna atangin thil tamtak ka hria a, chungte chu ka ziak dawn ani. (An thil tih dan zawng zawng erawh fimkhur thu hlaah ka ziak vek lovang)
And here is the rest of it Engvanga setana hnenah chuan lo inhlan/inthawi nge an nih?
Miin setana hnena an inthawi hian chhan leh vang chi hrang hrang an lo nei nual hlawm maia. Chungte chu i han thlir ho ang u:
1. Thenkhat chuan anmahni tiduhdah thin tu, an nu hrawn emaw an pahrawn emaw, an thiante emaw, midang pawh ni se, tih nat/sawisak ve an duh avangin thiltihtheihna dilin setana hnenah hian an lo inhlan ve mai thin.
2. Ruihtheih ching ho leh awm herh ho hian an ruihtheih chin te an neih theih na turin setana hnenah anlo inthawi fo bawk thin. (Setanan chawplehchilhin a pe mai bik lo. Pawisa ruk tur emaw, an ruihtheih neih theihna tur remchang tak an neih theih nan sual tih na hun remchang a siamsak zawk thin).
3. Naupangte an la nih laiin cartoon-ah te leh movie lamah pawh power nei ho an en nasa a, power neia an insual bur bur te hmuhnawm anlo ti a. An rawn lian zela chu thiltihtheihna (power) chu neih ve duhna thinlung an lo nei a, setana hnena lo inthawi ta hial mai te pawh an awm bawk.
4. Thenkhat erawh chu an thiante satanic lo ni sa ten an sawm ve avanga an inthawinaah kal ve in lo inthawi ve ta mai pawh tamtak an awm bawk.
5. A dang leh chu mihring mihrinnaah pawh sual ve hrim hrim, tha duh hauh lo te hian (an vai chuan an ni chuang lo) anlo inthawi ve thin bawk.
An inthawi tawh hnu hian engtinnge an awm zel?
Setana hnena inthawi zawng zawng hi setanan alo dawnsawn dan a inang vek kher lo va. Thiltihtheihna chak tak a pek te pawh an awm tehreng mai. Chutih rualin a then te erawh chu thiltihtheihna leh an thil duh te a pek theih nan condition alo siamsak ve fo thin. An taksa, an hmelthatna lai tak te zaia chumi thisen hmanga inthawi kher tur te pawhin a ti fo thin a ni. Hetianga lo ti tawh te pawh ka tawng fo tawh mai. An that laia hmeltha tak ni thin kha setanan an hmelthatna te chu engmah lovah a chantira, hmuh tlak loh khawpa hmelchhia te an lo nih phah ta thin a ni.
Mahni thisena inthawi tawh ngat chin ho phei hi chu setana hian a vil ngun bik a. Thil pawi/thil sual lian tham tak tak ti tur ten thu a pe a, a then te erawh mahni intihlum turin kham sang tak atanga zuang thla tur ten, inawkhlum tur ten, mi thisen chhuah tur te leh hurna kawnga nasa taka mi thlemthlu/hruai lut tur ten thu a pe bawk thin a ni. Setana thupek anga an tih mai loh chuan zanah te an mutnaah a rawn tihthaih fo va, hmelchhe em em, dum nguk mai, hmul thur ang ten a rawn inlar fo va, natna mak tak tak, doctor te pawhin investigation chikima an endik pawha natna hmuhchhuah theih siloh hmang ten a ti na fo thin a ni.
Thenkhat ve thung ah erawh chuan ngainatawm tak, tlangval/nula hmeltha tak ang ten a inlar bawka. A hnena an inthawi zawh khan an thil dil te pe turin a intiam a, mahse phut let a nei ziah thin a ni.
Setana hnena lo inhlan tawh, thui tak lokal tawh te phei chu an thlarau tirh chhuah theih na thuneihna te a pe a, anmahni atangin ramhuai tirhchhuah theihna thuneihna te a pe a, an huat zawng/an mi ngei zawng te an va tihthaih tira, an va sawisa thei thin a ni.
Tin thenkhat dang leh te chu setana hnena an inthawi leh hun atan an rawn ken tur signs & symbols mak pui pui te a pe a, chu chu an inthawi leh hunah setana hnenah an hlan bawk thin a ni.
Eng hunah nge an inthawi thin?
A tlangpui thu in full moon zanah hian an inthawi tlangpui thin. Group te tea inthawi thin te pawh an awm a, chutah chuan satanic ho zing rau rau ah pawh a "King" leh "Queen" bik te an nei thin. Tin, a then te erawh group nei ve lem lo, satanic dang ho va thurual pui ve lem lo, mahni inchhunga lo inthawi ve mai te pawh an awm nawk. A tlangpui thu in, hmun fianrial, midang ten an hmuh phak lohna hmun ni a an hriatnaah te leh thlanmualah te an inthawi tlangpui thin.
Aizawlah ringawt pawh hian group engemaw zat an awm tawh a. Chung group ho zinga thenkhat chuan an mi leh sa inhriat hran nan an ke ah Star (pentagram) tattoo te an chhu thin a. Thenkhat chu tuai ni miah si lo, an mithmulahte eyebrow an hnawih dum thin bawk a ni.
Anih leh enge satanic ho hian kristiante ah hian thil tum an neih?
Satanic ho hrim hrim pawh hi an inang lo nuaih a. Thenkhat chu kohhran, khawtlang, thalai pawl, etc. ah nelawm taka lana, rawngbawltute pawh nelawm taka kawma, zawi muanga an nun tihchhiat sak hi an tum thenkhat te zing ami a ni a. Nimahsela, satanic zawng zawng hian tum thuhmun pakhat an neih erawh chu Pathian Biak In tihbawrhbana, inthawina hmuna hman hi a ni.
Satanic an nih leh nih loh chu engtinnge kan hriat theih ang?
Kan sawi tawh ang khian satanic ho hian theihtawpin an zia thup ve hram an duh thin a. Tin, satanic an nih avang hian englai pawhin setanan a awmchilh loh chang te pawh an nei ve thin tho va. (Hetih hun lai hian an nun an ning ve thina, Pathian mi te an pan ve fo thin a ni.) Pathianin a hranpa liau liauvin hriatna min pe te anih loh chuan kan bulah thu ve reng mahsela, a hriat chuang loh. Nimahsela, Pathian thu te sawiin tawngtaina te han nei ila, thlarau indona Pathian hmingin han puang chiah ila, chutah tak chuan an buai thina, an zia a rawn chhuak ta thin a ni.
Chu lo leh ah chuan Pathianin A thlarau thianghlim thiltihtheihna min pek hmangin kan ringhlel anih chuan an taksaah (khawih kher a ngai lo) kan kut kan han phar hian an chhunga ramhuai bawlhhlawh te chuan awm ngaihna an hre lova, an zia an rawn chhuah fo bawk a ni.
Pathian phatsana setana bia a inthawi tawh an ni sia, an chhanchhuah theih tho em?
Pathian ngaihdamna leh hmangaihna lo thuk zia hi a takin kan hmu fo thin. Heti khawpa Pathian lo phatsan tawh tu te pawh hi Pathian chuan alo la chhandam duh teh meuh mai. Lal Isua khawvela alo kal lai pawh khan ramhuai pai te a hnawhchhuah thin kha!
Nimahsela, heng satanic ho chhanchhuak tur erawh chuan rinna ngheta kan din a ngai tak meuh meuh va. Lal Isua nun neilo tan chuan thil tih mai mai chi a ni hauh lo le! (Lal Isua kan nun ah kan neih leh neih loh chu Pathian leh setana hian an hre khawp mai!) A chhan chu, an mihring chakna mai ni tawh lovin setanan a tirhkoh ramhuaite a rawn tira, ramhuai bawlhhlawh ho chakna nen an tang kawp tawh a, chak tak hi an ni ringawt. Pianphunga cher em em, vawi khat hnek pawh dawl lo tura kan ngaih te hi kan man bet zo meuh lo a ni ber! Mahse, Pathian chakna leh thiltihtheihna rinchhana kan beih erawh chuan eng anga chak pawh ni sela, kan ban kan han phara Pathian hminga thu kan pek chuan an thal nghal thuai zel mai ani!
Setana hian a ma hnena lo inthawi tawh, a mi leh sa te hi a hre em em a, chan palh pawh a hlau hle a, chuvangin an kawchhunga ramhuai bawlhhlawh awm ho hi Pathian thiltihtheihna rinchhana sawisak hrep phawt an nih loh chuan an chhuhsan kim duh lo khawp mai. Ramhuai dawihzep tak tak leh ramhuai ngeng tak te pawh hi an lo awm ve zela! Chutianga, an chhuahsan tawh ni a kan hriat veleh tawngtaina nen an taksa pumpui chu Pathian thiltihtheihna hmangin kan kutin check chhuah leh vek an ngai fo thin (khawih kher an ngai lo), a bang nawi kan tih ang hi an lo la awm chawk thin. Chutiang chu uluk leh fimkhur taka kan zawn chhuah veka kan hnawhchuah vek phawt loh chuan Pathian thu an la ngaithla tha theilo fo va, chhandamna an la chang thei tak tak thin lo.
Ramhuai pai, satanic an ni emaw ni lo emaw kan hmachhawn dawn anih chuan Pathian thu-a counselling pianthar tum nghal ngawt a fuh ber lo. Pathian thu chu thinlung leh tihtakzeta an dawn theihna turin an kawchhunga mi kha sawisaka hnawhchhuah phawt an ngai fo thin tih hriat a tha hle.
Pathian hian misual ber te pawh a ngaidam duh a, ngaihdam tlak tawh lova inngai thleng te pawh a ngaidam thei/duh ani tih hi ilo hre thar leh ila. Chuvangin kan chhungkuaah emaw, kan chhehvelah emaw hetiang mite hi an awm anih chuan hawisan mai lovin Pathian chhanchhuah tak tak an chan theih na turin nang leh kei hian tih tur kan nei a ni tih i in hre nawn fo ang u.
Pathian hnenah a rawng chauh bawl tura inhlan tawh theuh kan nih ka beisei. Chuti anih si chuan kan tawngtaina hla pawh hi belh leh ila, Pathian thlarau thianghlim thilthlawnpek "thiltihtheihna" te hi dil tel ila a tha hle mai. Lalpan rem a tih chuan nang leh kei hi a hmanrua te zinga pakhatah min hmang thei si a. Chu thiltihtheihna kan dil tur chu hei hi a ni:
1. Pathian rawngbawlnaah ralhmatawngah leh sulsutauh tan ngam.
2. Damlo te chungah kut nghata tawngtai saka damna an chan theihna tura thiltihtheihna
3. Thlarau thianghlim hminga a mite malsawm theihna
4. Ramhuai bawlhhlawhte sawisak leh hnawhchhuah theih na thuneihna nasa tak.
Hawh u, hun leh ni te a that tawh loh em avang hian fimkhur takin nung ila, kan buante hi tisa leh thisen mai nilovin, van hmuna thlarau sual awm te an ni zawk tih hre rengin hma thar i la tlang theuh ang u.
Lalpan malsawm rawh se.
Print this post
Share
Category:
Religion
Subscribe to:
Post Comments (Atom)
Page visited since May 29,2001
Ka tlawh thin te:
-
-
-
Tum Angin Thil A Awmlo!4 years ago
-
-
-
To you - my children....11 years ago
-
Phone Hack ang aw....12 years ago
-
Mizo Ten Diar Kan Khim Thin3 years ago
-
-
20 comments:
Ralte, experience i ngah bawka, i ziak tha hle mai! Pathian thlarau thianghlin thilthlawnpek 'thiltihtheihna' han dil ngawt chu, mihring zia kan in an loh em avang zawkin, ringtu zawng zawng tih chi ani dawn em mawni le?
marka bung tawp ber kha lo chhiar teh. Heng chhinchhiahna zawng2 te hian ringtute...tih kha.. Mihring zia inan loh vanga ringtute ten tih loh ngawt chi anih ka hre hran lo. Kan dil a thiang a, A petu Pathian thu thu zawk a ni.
Thu i lo thiam phian hi mawle
A khai, pu HV-a thin hi aw... thu thiam hi ka chak thin khawp mai. Hei aia la ziah ngaihnawm theih tur hi ania, ka thiamna in a phawk thlawt lo ani!
A ngaihnawmin a bengvarthlak hle mai..
Pu Ralte, engmah tak2 hi ka hre lemlo nangin,Rebecca Brown lehkhabu kha ka chhiar ve a pa 2, michak chu phuar hmasak phawt a trul tih te chu ka lo hre thawi mai2 a, awmhmun a trawngtrai bak hi tihvak theih ka nei rihlo, kan ram hi rinaiin hmelmapa hian a thuhnuai hnem tawhin ka ring tawp, mahni pawh inrinhlelh rum2 chang ka ngah mai, minlo trawngtraipui ve thrin rawh aw..
j.lo,
Vawiina misuala i thil post leh comments ka chhiar atangin he thu hi ka rawn ziak ani tih ka sawi hmasa duh a. Ni e, ka lo tawngtaipui thin dawn che nia.
Ilo ti nasa toh hle mai ! Thlarau indonaah nasa takin i lokal toh anih hi ! 'Misual' a ka comment ang khan Paltalk ah hian an room ka hmu zeuh2 thin a, mahse ngaihsak lemlo leh Pathianthu lam tuipui vak lo tan chuan thil awihawm lo tak ani thei ang ka ring.Pathianin awm puiin, hruai che sela nasa takin malsawm che roh se !
@loneeagle26016: Mit ngeia hmu tu tan lo chuan awih harsa ve tak chu a ni. Mahse, thil tak tak a ni si!
Kan ram ngeia hetiang thil thleng chanchin hriat hian min ti chau fo mai. Hawh u, Lalpa hnen ata chakna thar nen kan hmelma(pa) bei tur hian i han in sangmar leh teh ang u.
Kan Ram hi Krista tan i hlan nawn mawlh mawlh teh ang u.
Beng i ti var e, tawngtaina tur chhan tam tak min siamtu a ni.
Thankis Sena Mizo. Ni e, Lalpa ram zauh zel turin theihtawp i chhuah thar leh theuh ang u.
Ziak tha kher mai, rin phak bakin Satanism hian kan Zoram hi a luah nasa ta mai a! Kan thlahtu ten Kristianna an hriat hma a Thingbul/Lungbul an biak thin ai khan he sual na hi a rapthlak ka ti tak zet a ni.
Ngaihnawmin bengvarthlak hle mai. Kristian tinte hian Thlarau Indona hmuna leng kan nih hi kan hriat nawn fo a va tul em! @Ralte, i rawngbawlna engtikah emaw la zui ve che ka va chak em!
Thlarau indona a lut tur chuan huaisen a ngai khawp ang le.I expi.ziak i ni a,i ziaktha hle mai.Kohhran hmeichhe hruaitu,Bial khawmpui a thusawina hial pawh nei tawh,Nu pakhat chhunga thlarau sual-chak lutuk mai si hi min hmuhtir tawh a.A chhunga thlarau ka hmu tih an hria chu-a hmela mi huatna mitmeng kha vawiin thleng hian ka mitthlaah a la chm reng.
i thu thenkhat hi ruk sak zeuh zeuh che ila atha in ka hria.. i phal em ang chu mo.. :)
Avan ngaihnawm mep mep vele
Rebecca Brown i ziahte poh tel hi..
Thatna sual ata hnehna tura chakna hi mi tamtak hian kan mamawh zawk fo thin. Chapona leh mani tha intih hliah hliahna hi sual a ni ve tho lomaw. Chutiang mi chu mi vanduai leh mi khawngaihthlak awm tak an ni tho ang ka ring.
A tha lutuk. Hetiang hriat chian hi a pawimawh reng a ni.
Tha lutuk ringawt!
Keichu ka hrethiam phave lo
Post a Comment